కోయంబత్తూరు: 5 ఏళ్లుగా ప్రేమించుకుంటున్న తరుణంలో తన ప్రేమికురాలికి జరిగిన అన్యాయం ఆ యువకుడిని తీవ్రంగా కలిచివేసింది. అయితే, ఆ చేదు జ్ఞాపకాన్ని పక్కన పెట్టి ఆమెను వివాహం చేసుకోవాలని అతను తీసుకున్న నిర్ణయం అందరినీ ఆశ్చర్యపరిచింది.
అసలేం జరిగింది?
మధురైకి చెందిన 21 ఏళ్ల యువతి కోయంబత్తూరులోని ఒక ప్రైవేట్ హాస్టల్‌లో ఉంటూ పీజీ చదువుతోంది. గత ఏడాది నవంబర్ 2వ తేదీ రాత్రి, ఆమె తన ప్రియుడితో కలిసి విమానాశ్రయం వెనుక ఉన్న బృందావన్ నగర్‌లో కారులో కూర్చుని మాట్లాడుకుంటోంది. ఆ సమయంలో అక్కడికి వచ్చిన ముగ్గురు దుండగులు కారు అద్దాన్ని పగులగొట్టి, యువకుడిని కత్తితో గాయపరిచారు. అనంతరం విద్యార్థినిని బెదిరించి నిర్మానుష్య ప్రాంతానికి తీసుకెళ్లి సామూహిక అత్యాచారానికి పాల్పడ్డారు.
ఈ కేసులో నిందితులైన కరుప్పసామి, కాళీశ్వరన్ (సోదరులు) మరియు తవసిలను పోలీసులు కాల్పులు జరిపి పట్టుకున్నారు. కోయంబత్తూరు మహిళా కోర్టులో జరిగిన ఈ కేసు విచారణ కేవలం 4 నెలల్లోనే పూర్తయింది.
కోర్టు తీర్పు:
న్యాయమూర్తి సుందరరాజన్ నిందితులు ముగ్గురికీ చనిపోయే వరకు జీవితఖైదు విధిస్తూ సంచలన తీర్పు ఇచ్చారు. బాధితురాలికి ₹7 లక్షలు, గాయపడిన యువకుడికి ₹2 లక్షల నష్టపరిహారం చెల్లించాలని కూడా ఆదేశించారు.
ప్రియుడి గొప్ప మనసు:
ప్రభుత్వ తరపు న్యాయవాది జిషా ఈ కేసు గురించి మాట్లాడుతూ.. ఈ ఘటన తర్వాత విద్యార్థిని తీవ్ర మానసిక కుంగుబాటుకు లోనైందని తెలిపారు. ఆమెను సాధారణ స్థితికి తీసుకురావడంలో ఆమె ప్రియుడు ఎంతో సహకరించాడని పేర్కొన్నారు.
ఆశ్రయం: విచారణ కోసం మధురై నుండి కోయంబత్తూరుకు తరచుగా రావాల్సి ఉండటంతో, యువకుడు తన తల్లిదండ్రుల అంగీకారంతో తన ఇంట్లోనే ఆమెకు ఒక గది కేటాయించి రక్షణగా నిలిచాడు.
పెళ్లి నిర్ణయం: ఇన్స్టాగ్రామ్ ద్వారా ఐదేళ్ల క్రితం మొదలైన వీరి పరిచయం ప్రేమగా మారింది. ఆ అమానుష ఘటన తర్వాత ఆమెను వదిలేయకుండా, ఆమెకు తోడుగా నిలవాలని అతను నిర్ణయించుకున్నాడు. ఆ ఘటనను ఒక “చెడు కల”గా భావించి మర్చిపోతానని, ఆమెనే వివాహం చేసుకుంటానని అతను ధైర్యంగా చెప్పినట్లు న్యాయవాది తెలిపారు.