మధ్యప్రదేశ్‌లోని భోపాల్‌లో నర్సుగా పనిచేస్తున్న సింఖలత అనే యువతి అక్టోబర్ 8 నుండి అకస్మాత్తుగా అదృశ్యమైంది. కాగా, ఆమెను కొట్టి చంపి, ఉత్తరప్రదేశ్‌లోని ఇటావా జిల్లాలో మొసళ్లు అధికంగా ఉండే నదిలో పడేసి ఉంటారన్న దిగ్భ్రాంతికర విషయం వెలుగులోకి వచ్చింది.
బీహార్‌కు చెందిన సింఖలత, సత్యప్రకాష్ అనే వ్యక్తి భిండ్ ప్రాంతంలో కళాశాలలో చదువుకుంటున్నప్పుడు పరిచయమయ్యారు. ఆ తర్వాత వీరిద్దరూ కలిసి జీవించడం (లివ్-ఇన్) ప్రారంభించారు. అయితే, సత్యప్రకాష్‌కు ఇదివరకే వివాహం కాగా, తనను భార్యగా అంగీకరించాలని సింఖలత ఒత్తిడి చేయడం, పిల్లల విషయమై ఇద్దరి మధ్య వచ్చిన విభేదాలే ఈ దారుణ హత్యకు ప్రధాన కారణమై ఉండవచ్చని పోలీసులు అనుమానిస్తున్నారు.
సింఖలత కనిపించడం లేదని కుటుంబ సభ్యులు ఇచ్చిన ఫిర్యాదుతో దర్యాప్తు చేపట్టిన పోలీసులు, ఆమెతో కలిసి ఉంటున్న సత్యప్రకాష్‌ను అదుపులోకి తీసుకుని తీవ్రంగా విచారించారు. ఆ విచారణలో తానే సింఖలత గొంతు నులిమి హత్య చేసి, మృతదేహాన్ని వంతెన పైనుంచి నదిలోకి విసిరేసినట్లు నిందితుడు అంగీకరించాడు.
నదిలో ఉన్న మొసళ్లు మృతదేహాన్ని తినేస్తే శవం ఆచూకీ దొరకదనే ఉద్దేశంతోనే పథకం ప్రకారం ఈ హత్య చేసినట్లు అతడు వెల్లడించాడు. అనంతరం నిందితుడిని ఇటావా పరిధిలోని ఐదు నదులు కలిసే ‘పచ్నదా’ ప్రాంతానికి తీసుకెళ్లిన పోలీసులు గాలింపు చర్యలు చేపట్టారు.
అయితే, ఆ నదిలో మొసళ్ల సంఖ్య అధికంగా ఉండటంతో మృతదేహాన్ని వెలికితీయడం పోలీసులకు పెద్ద సవాలుగా మారింది. ఈ ఘటన ఆ ప్రాంతంలో తీవ్ర సంచలనం సృష్టించగా, నిందితుడికి కఠిన శిక్ష పడేలా చేయాలని సింఖలత కుటుంబ సభ్యులు కన్నీరుమున్నీరవుతూ డిమాండ్ చేస్తున్నారు.
Leave a Reply