భారతదేశం అంతటా జాతీయ రహదారుల నెట్‌వర్క్ విస్తరించడంతో ప్రయాణాలు సులభతరమయ్యాయి. తాజాగా, నేషనల్ హైవేస్ అథారిటీ ఆఫ్ ఇండియా (NHAI) హైవేలపై పరిశుభ్రతను పెంపొందించే లక్ష్యంతో ఒక అద్భుతమైన పథకాన్ని ప్రవేశపెట్టింది. ‘క్లీన్ టాయిలెట్ ఛాలెంజ్’ (Clean Toilet Challenge) అనే ఈ పథకం కింద, జాతీయ రహదారులపై అపరిశుభ్రంగా ఉన్న టాయిలెట్లను ఫోటో తీసి పంపిన వాహనదారులకు రూ. 1000 విలువైన ఫాస్టాగ్ (FASTag) రీఛార్జ్ ఉచితంగా లభిస్తుంది. ఈ పథకానికి వస్తున్న ఆదరణ చూసి, దీనిని ఈ ఏడాది జూన్ 30 వరకు పొడిగించారు.
ఫిర్యాదు చేయడం ఎలా? ఉచితంగా రూ. 1000 ఫాస్టాగ్ రీఛార్జ్ పొందడానికి ఈ క్రింది పద్ధతిని పాటించాలి:
- మీ మొబైల్‌లో ‘Rajmargyatra’ (రాజ్‌మార్గ్ యాత్ర) యాప్‌ను డౌన్‌లోడ్ చేసుకోండి.
- జాతీయ రహదారిపై అపరిశుభ్రంగా ఉన్న టాయిలెట్‌ను ఫోటో తీయండి. ఆ ఫోటోలో తేదీ మరియు సమయం ఖచ్చితంగా ఉండాలి.
- మీ పేరు, లొకేషన్, వాహన నంబర్ మరియు మొబైల్ నంబర్‌తో పాటు ఆ ఫోటోను అప్‌లోడ్ చేయండి.
- అధికారులు మీ ఫోటోను తనిఖీ చేసి, అది నిజమని నిర్ధారిస్తే.. మీ ఫాస్టాగ్ ఖాతాలో రూ. 1000 రీఛార్జ్ చేయబడుతుంది.
ముఖ్యమైన నిబంధనలు:
- ఈ మొత్తం నగదు రూపంలో లభించదు, కేవలం ఫాస్టాగ్ రీఛార్జ్ రూపంలోనే వస్తుంది.
- ఒక వాహనానికి ఒక్కసారి మాత్రమే ఈ బహుమతి లభిస్తుంది.
- ఈ పథకం కేవలం జాతీయ రహదారుల (National Highways)పై ఉన్న టాయిలెట్లకు మాత్రమే వర్తిస్తుంది. ప్రైవేట్ పెట్రోల్ బంకులు లేదా హోటళ్లలోని టాయిలెట్లకు వర్తించదు.
- ఒకే టాయిలెట్‌పై చాలా మంది ఫిర్యాదు చేస్తే, మొదట ఫిర్యాదు చేసిన వారికే ఈ బహుమతి అందుతుంది.