బంగ్లాదేశ్‌లో ఇటీవల జరిగిన ఎన్నికల్లో BNP (బంగ్లాదేశ్ నేషనలిస్ట్ పార్టీ) అతిపెద్ద పార్టీగా అవతరించింది. ఆ పార్టీ అధ్యక్షుడు తారిక్ రెహమాన్ తదుపరి ప్రధానిగా బాధ్యతలు చేపట్టనున్నారు. ఫిబ్రవరి 17న జరగనున్న ఈ ప్రమాణ స్వీకార మహోత్సవానికి ప్రపంచ దేశాల నాయకులను ఆహ్వానించారు. ఈ క్రమంలో భారత ప్రధాని నరేంద్ర మోదీకి కూడా ఆహ్వానం అందింది.
ప్రధాని మోదీ వెళ్లే అవకాశం ఉందా? ఫిబ్రవరి 17న ప్రధాని మోదీ ఢాకా వెళ్లే అవకాశం తక్కువగా ఉందని సమాచారం. ఎందుకంటే అదే రోజు ఆయన ముంబైలో ఫ్రాన్స్ అధ్యక్షుడు ఇమ్మాన్యుయేల్ మాక్రాన్‌తో ద్వైపాక్షిక చర్చలు జరపాల్సి ఉంది. ‘AI ఇంపాక్ట్ సమ్మిట్’లో పాల్గొనేందుకు మాక్రాన్ భారత్‌కు వస్తున్నారు. ప్రధాని మోదీ అందుబాటులో లేని పక్షంలో, భారత్ తరపున ఉపరాష్ట్రపతి లేదా విదేశీ వ్యవహారాల మంత్రి ఈ వేడుకకు హాజరయ్యే అవకాశం ఉంది.
సంబంధాల పునరుద్ధరణే లక్ష్యం: ఈ వేడుకకు పాకిస్థాన్ ప్రధాని షెహబాజ్ షరీఫ్ కూడా హాజరయ్యే అవకాశం ఉందని తెలుస్తోంది. గతంలో దెబ్బతిన్న భారత్-బంగ్లాదేశ్ సంబంధాలను మళ్లీ గాడిలో పెట్టడం ఇప్పుడు రెండు దేశాల ప్రాధాన్యతగా మారింది. తన తండ్రి జియావుర్ రెహమాన్ స్థాపించిన ‘సార్క్’ (SAARC) దేశాల స్ఫూర్తితో, తారిక్ రెహమాన్ పొరుగు దేశాలతో సత్సంబంధాలను ఆశిస్తున్నారు. BNP విజయం తర్వాత ప్రధాని మోదీ కూడా స్పందిస్తూ.. ఉమ్మడి అభివృద్ధి లక్ష్యాల కోసం కొత్త ప్రభుత్వంతో కలిసి పనిచేయడానికి సిద్ధంగా ఉన్నామని తెలిపారు.