చిన్నారుల అల్లరి, కొంటె పనులు కొన్నిసార్లు హద్దులు దాటి, తల్లిదండ్రులకు పెద్ద తలనొప్పిగా మారుతుంటాయి. సరిగ్గా అలాంటి ఘటనే చైనాలోని కున్మింగ్ ప్రాంతంలో చోటుచేసుకుంది.
ఒక వ్యాపారవేత్త తన ₹4.3 కోట్ల (సుమారు 3.6 మిలియన్ యువాన్) విలువైన అత్యాధునిక ‘ఫెరారీ’ లగ్జరీ స్పోర్ట్స్ కారును రోడ్డు పక్కన పార్క్ చేసి తన పని మీద వెళ్ళారు. ఆ సమయంలో అక్కడ ఆడుకుంటున్న నలుగురు చిన్నారులు, ఆ ఖరీదైన కారును ఆటబొమ్మగా మార్చేశారు.
తమ చేతిలో ఉన్న కర్రలతో కారును బాదుతూ, ఒక దశలో ఆ పిల్లలు ఫెరారీ కారు బోనెట్ ఎక్కి, పార్కులో జారుడు బల్ల (Slide) మీద ఆడుకున్నట్లుగా జారుతూ అల్లరి చేశారు. ఈ అల్లరి వల్ల కారు బంపర్ పగిలిపోవడమే కాకుండా, కారు మొత్తం గీతలు పడి తీవ్రంగా దెబ్బతింది. తిరిగి వచ్చిన వ్యాపారవేత్త తన కారును చూసి షాక్కు గురయ్యారు. సమీపంలోని సిసిటివి ఫుటేజీని పరిశీలించగా, పిల్లల ఈ దారుణమైన అల్లరి బయటపడింది. ఈ నష్టాన్ని సరిచేయడానికి సుమారు ₹4.6 లక్షల ఖర్చవుతుందని అంచనా.
బాధిత కారు యజమాని పిల్లల తల్లిదండ్రులను సంప్రదించి నష్టపరిహారం కోరగా, మొదట వారు కొన్ని వందల యువాన్లు మాత్రమే ఇస్తామని నిర్లక్ష్యంగా సమాధానమిచ్చారు. తర్వాత కారు విలువను గ్రహించినప్పటికీ, గరిష్టంగా 5,000 యువాన్లు (సుమారు ₹60,000) మాత్రమే చెల్లించగలమని, అంతకు మించి మొత్తం డబ్బులు కట్టలేమని తేల్చి చెప్పారు.
ఎక్స్ (X) ప్లాట్ఫామ్లో ‘@VoiceOfChina_’ అనే ఖాతాలో పోస్ట్ చేయబడిన ఈ సిసిటివి వీడియో ప్రస్తుతం నెట్టింట వైరల్గా మారింది. “కారు యజమాని ఆ తల్లిదండ్రులపై చట్టపరంగా చర్యలు తీసుకోవాలా? లేక పిల్లలు కాబట్టి క్షమించి వదిలేయాలా?” అంటూ నెటిజన్లు పెద్ద ఎత్తున చర్చించుకుంటున్నారు.