బెంగళూరు: కర్ణాటక రాజధాని బెంగళూరులో ఇన్స్టాగ్రామ్ (Instagram) ద్వారా ఏర్పడిన పరిచయంతో ఇద్దరు పాఠశాల విద్యార్థినులపై లైంగిక దాడి (రేప్) జరిగిన ఘోర ఉదంతంలో.. ఒక మైనర్ బాలుడితో సహా నలుగురు నిందితులను పోలీసులు పోక్సో (POCSO) చట్టం కింద అరెస్ట్ చేశారు.
బాధితులైన ఇద్దరు విద్యార్థినులు ఇన్స్టాగ్రామ్ సోషల్ మీడియా ద్వారా ఒక అమ్మాయితో స్నేహం చేశారు. ఈ క్రమంలో, ఆ స్నేహితురాలు తన ఇంటికి రావాలంటూ ఈ విద్యార్థినులను ఆహ్వానించింది. ఆమె మాటలను నమ్మి ఇంటికి వెళ్లిన విద్యార్థినులపై.. అక్కడికి వచ్చిన ఒక మైనర్ బాలుడు, అతని అనుచరులు కలిసి బలవంతంగా లైంగిక దాడికి పాల్పడ్డారు.
వీడియో తీసి బ్లాక్మెయిల్ – భయంతో దాచిన బాలికలు:
అంతటితో ఆగకుండా, తాము చేసిన ఈ దారుణాన్ని ఆ మైనర్ ముఠా తమ సెల్ఫోన్లలో వీడియోగా రికార్డ్ చేసుకుంది. ఈ విషయం గురించి ఎవరికైనా చెబితే, వీడియోలను మరియు ఫోటోలను ఇంటర్నెట్లో అప్లోడ్ చేస్తామంటూ ఆ బాలికలను నిరంతరం బెదిరించడం ప్రారంభించింది. ఆ ముఠా బెదిరింపులకు భయపడిపోయిన విద్యార్థినులు.. తమకు జరిగిన ఈ ఘోర అన్యాయాన్ని ఎవరికీ చెప్పకుండా చాలా రోజులుగా మనసులోనే దాచుకుని నరకం అనుభవించారు.
ప్రవర్తనలో మార్పుతో బయటపడ్డ ఘోరం:
అయితే, ఇటీవల ఆ విద్యార్థినుల ప్రవర్తనలో వచ్చిన మార్పులను గమనించిన తల్లిదండ్రులు అనుమానంతో వారిని ప్రేమగా దగ్గరకు తీసుకుని విచారించారు. దాంతో ఆ బాలికలు తమకు జరిగిన ఘోరాన్ని చెప్తూ కన్నీరు మున్నీరయ్యారు. ఈ దారుణంపై తల్లిదండ్రులు వెంటనే పోలీసులకు ఫిర్యాదు చేశారు. రంగంలోకి దిగిన పోలీసులు కేసు నమోదు చేసి, ఆ నలుగురు నిందితులను చుట్టుముట్టి అరెస్ట్ చేశారు. ప్రస్తుతం వీరిపై తీవ్రమైన సెక్షన్ల కింద కేసు నమోదు చేసి విచారణను వేగవంతం చేశారు.