లండన్: లండన్ హీత్రో విమానాశ్రయం నుండి బెంగళూరు బయలుదేరాల్సిన ఎయిర్ ఇండియా బోయింగ్ 787-8 విమానంలో టేకాఫ్ కంటే ముందే ఫ్యూయల్ కంట్రోల్ స్విచ్‌లో సమస్య తలెత్తింది. దీంతో భద్రతా కారణాల దృష్ట్యా ఆ విమాన ప్రయాణాన్ని నిలిపివేశారు.
అసలేం జరిగింది?: ఎయిర్ ఇండియా విడుదల చేసిన ప్రకటన ప్రకారం, ఫ్లైట్ నంబర్ AI 132 ఇంజిన్ స్టార్ట్ చేస్తున్న సమయంలో ఎడమ వైపు ఇంజిన్ యొక్క ఫ్యూయల్ కంట్రోల్ స్విచ్ రెండుసార్లు ‘RUN’ పొజిషన్‌లో నిలవకుండా తిరిగి ‘CUTOFF’ పొజిషన్‌కు వచ్చేసింది. ప్రయాణికుల భద్రతను దృష్టిలో ఉంచుకుని పైలట్ విమానాన్ని నిలిపివేసి అధికారులకు సమాచారం అందించారు.
ఎయిర్ ఇండియా స్పందన: “మా పైలట్ బోయింగ్ 787-8 విమానంలోని ఫ్యూయల్ కంట్రోల్ స్విచ్‌లో లోపం ఉన్నట్లు గుర్తించారు. వెంటనే ఆ విమానాన్ని గ్రౌండ్ చేసి (నిలిపివేసి) తనిఖీలకు ఆదేశించాము. ఈ విషయాన్ని విమానయాన నియంత్రణ సంస్థ DGCA కి కూడా తెలియజేశాము. మా ప్రయాణికులు మరియు సిబ్బంది భద్రతకే మా మొదటి ప్రాధాన్యత” అని ఎయిర్ ఇండియా ప్రతినిధి తెలిపారు. గత ఏడాది అహ్మదాబాద్‌లో జరిగిన ఎయిర్ ఇండియా విమాన ప్రమాదంలో కూడా ఇటువంటి ఫ్యూయల్ స్విచ్ సమస్యే ప్రధాన కారణమని వార్తలు వచ్చిన నేపథ్యంలో, ఈ ఘటన ప్రాధాన్యత సంతరించుకుంది.