అశాంతి మరియు అరాచక పరిస్థితుల మధ్య బంగ్లాదేశ్ మరో కొత్త సమస్యను ఎదుర్కొంటోంది. ‘ది డైలీ స్టార్’ నివేదిక ప్రకారం, నిధుల కొరత మరియు సిబ్బంది సంక్షోభం కారణంగా ప్రభుత్వ కుటుంబ నియంత్రణ కార్యక్రమాలు కుంటుపడ్డాయి. ప్రస్తుతం బంగ్లాదేశ్ ప్రభుత్వ నిల్వల్లో కేవలం 39 రోజులకు సరిపడా కండోమ్‌లు మాత్రమే ఉన్నాయి.
వచ్చే ఏడాది ప్రారంభంలో కనీసం ఒక నెల పాటు ప్రభుత్వం కండోమ్‌ల సరఫరాను పూర్తిగా నిలిపివేసే పరిస్థితి కనిపిస్తోంది. దీనివల్ల బంగ్లాదేశ్‌లో జననాల రేటు (Birth Rate) ఒక్కసారిగా పెరిగే ప్రమాదం ఉందని నిపుణులు ఆందోళన వ్యక్తం చేస్తున్నారు.
50 ఏళ్లలో మొదటిసారి పెరిగిన జననాల రేటు: గత కొన్నేళ్లుగా బంగ్లాదేశ్‌లో జనన నియంత్రణ సాధనాల వాడకం తగ్గుతోంది. ఇటీవలి సర్వేల ప్రకారం, గత 50 ఏళ్లలో మొదటిసారిగా అక్కడ మొత్తం జననాల రేటు (TFR) పెరిగింది. గత ఏడాది 2.3గా ఉన్న రేటు ఇప్పుడు 2.4కు చేరుకుంది. సాధనాల కొరత వల్ల ఇది మరింత పెరిగే అవకాశం ఉంది.
బంగ్లాదేశ్‌లో తాజా అల్లర్లు: భారత వ్యతిరేకిగా ముద్రపడిన హాదీ మరణం తర్వాత బంగ్లాదేశ్‌లో హింసాకాండ మళ్ళీ మొదలైంది. హిందూ యువకుడిని నిప్పు పెట్టి చంపడం, పత్రికా కార్యాలయాలపై దాడులు చేయడం వంటి ఘటనలు చోటుచేసుకున్నాయి. ఛాయానట్ భవన్, ఉదీచీ శిల్పిగోష్ఠి కార్యాలయం వంటి కీలక ప్రాంతాలకు ఆందోళనకారులు నిప్పు పెట్టారు.
హిందూ యువకుడి హత్యపై ప్రభుత్వం ఏమంటోంది?: మహ్మద్ యూనస్ నేతృత్వంలోని మధ్యంతర ప్రభుత్వం ఈ హత్యను మతపరమైన దాడిగా అంగీకరించడం లేదు. మృతుడు అమృత్ మండల్ అలియాస్ సమ్రాట్ ఒక నేరస్థుడని, వసూళ్ల కోసం వెళ్లినప్పుడు జరిగిన గొడవలో స్థానికుల చేతిలో చనిపోయాడని ప్రభుత్వం ఒక ప్రకటనలో పేర్కొంది.