బంగ్లాదేశ్‌లోని ఒక కాళీ మందిరంలో పూజ జరుగుతుండగా ముసుగులు ధరించిన కొందరు దుండగులు బాంబు దాడికి పాల్పడ్డారు. ఈ దారుణ దృశ్యాలు ఆలయ సిసిటివి (CCTV) కెమెరాలో రికార్డ్ అయ్యాయి. ఈ ఘటనతో ఆ ప్రాంతమంతా భయాందోళనలు మరియు ఉద్రిక్త పరిస్థితులు నెలకొన్నాయి.
అసలేం జరిగింది? కుమిల్లాలోని ఠాకూర్ పారాలో గల కాళీగచ్ ఆలయంలో భక్తులు శనిదేవుని పూజలో నిమగ్నమై ఉన్న సమయంలో ఈ ఘటన జరిగింది. ముఖాలకు రాక్షసుల ముసుగులు ధరించిన కొందరు వ్యక్తులు ఆలయ ప్రాంగణానికి చేరుకుని, బాంబు ఉన్న బ్యాగును అక్కడ ఉంచి వేగంగా పారిపోయారు. హారతి ఇస్తున్న సమయంలో ఒక్కసారిగా భారీ పేలుడు సంభవించింది. పేలుడు ధాటికి భయాందోళనలకు గురైన భక్తులు ప్రాణాలను కాపాడుకోవడానికి పరుగులు తీశారు.
పూజారికి తీవ్ర గాయాలు: ఈ పేలుడులో ఆలయ పూజారి కేశబ్ చక్రవర్తి తీవ్రంగా గాయపడ్డారు. ఆయన్ని వెంటనే చికిత్స నిమిత్తం కుమిల్లా మెడికల్ కాలేజీ ఆసుపత్రికి తరలించారు. 2021 దుర్గాపూజ సమయంలో కూడా ఇదే ఆలయంపై దాడి జరిగిందని స్థానికులు చెబుతున్నారు.
సిసిటివి ఫుటేజీ ఆధారంగా దర్యాప్తు: దుండగుల కదలికలన్నీ ఆలయ వెలుపల ఉన్న సిసిటివిలో రికార్డ్ అయ్యాయి. ఈ వీడియో ఆధారంగా నిందితులను గుర్తించేందుకు పోలీసులు ప్రయత్నిస్తున్నారు. ఘటన జరిగిన వెంటనే భద్రతా బలగాలు అక్కడికి చేరుకుని ఆ ప్రాంతాన్ని తమ ఆధీనంలోకి తీసుకున్నాయి. బంగ్లాదేశ్‌లో గత కొన్ని ఏళ్లుగా మైనారిటీల ఆలయాలు మరియు మతపరమైన స్థలాలపై దాడులు పెరుగుతుండటం గమనార్హం.