రాజస్థాన్‌లోని బాడ్మేర్‌లో ఒక విస్తుపోయే ఘటన వెలుగులోకి వచ్చింది. పరస్పర అంగీకారంతో శృంగారంలో పాల్గొన్న తర్వాత, రహస్యంగా వీడియో తీసి ఓ న్యాయవాదిని లక్షల రూపాయలు డిమాండ్ చేసిన యువతిని పోలీసులు అరెస్ట్ చేశారు. ప్రస్తుతం పోలీసులు ఆమెను కస్టడీలోకి తీసుకుని విచారిస్తున్నారు.
బ్లాక్‌మెయిలింగ్ ఉదంతం ఏమిటి?
పోలీసుల కథనం ప్రకారం.. నిందితురాలు మొదట ఒక న్యాయవాదికి ఫోన్ చేసి హోటల్‌కు పిలిపించింది. అక్కడ వారిద్దరూ పరస్పర అంగీకారంతో శారీరక సంబంధం పెట్టుకున్నారు. అయితే, ఆ లాయర్ గది నుండి బయటకు రాగానే, అతని వాట్సాప్‌కు ఒక అశ్లీల వీడియో వచ్చింది. ఆ యువతే రహస్యంగా ఆ వీడియోను రికార్డ్ చేసింది. ఆ వీడియోను చూపించి, అతడిని భయపెడుతూ రూ. 40 లక్షలు ఇవ్వాలని డిమాండ్ చేసింది.
పోలీసుల రంగప్రవేశం – విచారణ
యువతి డిమాండ్‌కు తలొగ్గకుండా, సదరు న్యాయవాది వెంటనే జిల్లా పోలీసు ఉన్నతాధికారులకు సమాచారం అందించారు. రంగంలోకి దిగిన పోలీసులు ప్రత్యేక బృందాన్ని ఏర్పాటు చేసి నిందితురాలిని అదుపులోకి తీసుకున్నారు. కోర్టు ఆమెకు రెండు రోజుల పోలీసు రిమాండ్ విధించింది.
విచారణలో తేలిన షాకింగ్ నిజాలు:
- నిందితురాలు నగరంలో ఒక ఫ్లాట్ తీసుకుని నివసిస్తోంది. ఆ ఫ్లాట్‌నే తన బ్లాక్‌మెయిలింగ్ అడ్డాగా మార్చుకుంది.
- ఇదే పద్ధతిలో నగరంలోని పలువురు ప్రముఖులను ట్రాప్ చేసి, బ్లాక్‌మెయిల్ చేయడం ద్వారా ఆమె ఇప్పటివరకు కోట్లాది రూపాయలు వసూలు చేసినట్లు సమాచారం.
- ఈ నేరాల్లో ఆమె ఒంటరిగా పనిచేస్తోందా లేక దీని వెనుక ఏదైనా పెద్ద ముఠా ఉందా అనే కోణంలో పోలీసులు దర్యాప్తు చేస్తున్నారు.