న్యూయార్క్: “ఏఐ (AI) సాంకేతికత అభివృద్ధి వల్ల పెద్ద ఐటీ కంపెనీల్లో నా లాంటి ఉద్యోగులు ఎప్పుడు తొలగించబడతామో అన్న భయం వెంటాడుతోంది. కానీ, 100% ఉద్యోగ భద్రత ఉన్న ఏకైక రంగం వైద్య వృత్తి (MBBS) మాత్రమే.
ఒక డాక్టర్ ఎప్పటికీ ఖాళీగా ఉండరు. ఐటీలోలాగా అనుభవం పెరిగే కొద్దీ ఉద్యోగం పోతుందన్న భయం వారికి ఉండదు. వారి సంపాదన పెరుగుతూనే ఉంటుంది. సాధారణ వైద్యులు కూడా నెలకు రూ. 5 లక్షల వరకు సంపాదిస్తారు. చాలామంది డాక్టర్లు బిఎండబ్ల్యూ (BMW), బెంజ్ (Benz), ఆడి (Audi) వంటి లగ్జరీ కార్లలో తిరుగుతుంటారు. కానీ, ఐటీ రంగంలో ప్రవేశించే సగటు ఉద్యోగి ప్రారంభ జీతం కేవలం రూ. 30 వేలుగానే ఉంది. ఈ పరిస్థితులను చూస్తుంటే భారతదేశంలో వైద్య విద్య చదవడం వృథా అని ఎందుకు అంటారో నాకు అర్థం కావడం లేదు” అని అమెరికాలోని ఒక ఐటీ కంపెనీలో ఉద్యోగం కోల్పోయిన భారతీయుడు ‘రెడిట్’ (Reddit) వేదికగా తన ఆవేదనను వ్యక్తం చేశారు.
నెటిజన్ల స్పందన: ఈ పోస్ట్పై సోషల్ మీడియాలో పెద్ద ఎత్తున చర్చ జరుగుతోంది. ఐటీ ఉద్యోగి చేసిన వ్యాఖ్యలను పలువురు నెటిజన్లు, వైద్యులు తీవ్రంగా తప్పుబట్టారు.
- వైద్యుల వాదన: “రూ. 5 లక్షల జీతమా? అది ఏ డాక్టరో మాకు తెలియదు. నిజం తెలియకుండా ఇలా పచ్చి అబద్ధాలు మాట్లాడకండి. ఎంబీబీఎస్ పూర్తి చేసిన చాలా మందికి కేవలం రూ. 35 వేలే జీతం వస్తోంది. కార్పొరేట్ ఆసుపత్రుల్లో చేరినా రూ. 25 వేలకే పనిచేయాల్సి వస్తోంది. రూ. 5 లక్షల జీతం సంపాదించాలంటే పీజీ పూర్తి చేసి సుమారు 15 ఏళ్లు కష్టపడాలి” అని వైద్యులు స్పష్టం చేశారు.
- మరికొందరు: “వైద్య వృత్తిలో ఏఐ వంటి టెక్నాలజీ వల్ల ఉద్యోగ భద్రత ఉన్న మాట నిజమే, కానీ దానికి అవసరమైన త్యాగాలు, సుదీర్ఘమైన విద్యాభ్యాసం (10-13 ఏళ్లు) గురించి ఎవరూ మాట్లాడటం లేదు” అని కామెంట్ చేశారు.