కర్ణాటకలోని బెంగళూరులో ఒక స్థానిక క్రికెట్ టోర్నమెంట్‌లో ఓడిపోయిన తర్వాత తలెత్తిన గొడవలో, ఒక సాఫ్ట్‌వేర్ ఇంజనీర్ తన స్నేహితుడిని కారుతో తొక్కించి ఉద్దేశపూర్వకంగా చంపినట్లు పోలీసులు సోమవారం తెలిపారు.
మృతుడిని వీరసాంద్ర ప్రాంతానికి చెందిన 33 ఏళ్ల బాడీబిల్డర్ ప్రశాంత్ ఎంగా గుర్తించారు. ఎలక్ట్రానిక్ సిటీలోని ఒక మాల్ వెనుక ఉన్న ఖాళీ మైదానంలో ఆదివారం సాయంత్రం ఈ ఘటన జరిగింది. సాఫ్ట్‌వేర్ ఇంజనీర్ అయిన రోషన్ హెగ్డే (37) మరియు ప్రశాంత్ ఇద్దరూ ఒకే జట్టులో ఆడి మ్యాచ్ ఓడిపోయారు.
ఘటన ఎలా జరిగింది?
పోలీసుల కథనం ప్రకారం (టైమ్స్ ఆఫ్ ఇండియా కథనం ఉటంకిస్తూ).. కమ్మసంద్రలో క్రికెట్ ఆడిన అనంతరం ఆ స్నేహితుల బృందం మద్యం సేవించింది.
“మద్యం మత్తులో ఉన్న ప్రశాంత్, రోషన్ దగ్గరకు వెళ్లి లైటర్ అడిగాడు. ఆ సమయంలో ఇద్దరి మధ్య మాట మాట పెరిగి గొడవ మొదలైంది,” అని ఒక పోలీసు అధికారి తెలిపారు. ఈ గొడవ ముదిరి ఇద్దరూ బీరు సీసాలతో దాడి చేసుకునే వరకు వెళ్లింది. ఆ తర్వాత రోషన్ అక్కడి నుండి వెళ్ళిపోయి తన టాటా సఫారి ఎస్‌యూవీ (SUV) ఎక్కి వెళ్ళడానికి ప్రయత్నించాడు.
అయితే, ప్రశాంత్ ఆ కారును వదలకుండా వెంటాడి, కారు డోరును పట్టుకుని వేలాడాడు. వీరసాంద్ర-కమ్మసంద్ర రోడ్డుపై కారు వేగంగా వెళ్తుండగా, రోషన్ ఉద్దేశపూర్వకంగా కారు వేగాన్ని పెంచి మొదట ఒక కాంపౌండ్ గోడకు గుద్దాడు. ఆ తర్వాత కారును రివర్స్ తీసి వేగంగా ఒక చెట్టుకు డీకొట్టాడు.
కారులోని డ్యాష్‌క్యామ్ (Dashcam) ఫుటేజీని పరిశీలించగా అసలు విషయం వెలుగులోకి వచ్చింది. కారు బయట వేలాడుతున్న ప్రశాంత్‌ను వదిలించుకోవడానికి రోషన్ కావాలనే కారును గోడకు, చెట్టుకు గుద్దినట్లు స్పష్టమైంది. ఈ ప్రమాదంలో తీవ్రంగా గాయపడిన ప్రశాంత్ అక్కడికక్కడే మృతి చెందాడు.
పోలీసుల విచారణ
ప్రారంభంలో పోలీసులు దీనిని రోడ్డు ప్రమాదంగా భావించి ఫిర్యాదు అందుకున్నారు. కానీ కారులో ఉన్న డ్యాష్ కెమెరాను తనిఖీ చేయగా, ఇది ప్రమాదం కాదని, ఉద్దేశపూర్వకంగా చేసిన హత్య అని తేలింది. ప్రస్తుతం నిందితుడు రోషన్‌ను పోలీసులు అరెస్ట్ చేసి, భారతీయ న్యాయ సంహిత (BNS) కింద హత్య కేసు నమోదు చేశారు.