న్యూఢిల్లీ: పశ్చిమ బెంగాల్ అసెంబ్లీ ఎన్నికల్లో భారతీయ జనతా పార్టీ (BJP) చారిత్రక విజయం సాధించిన కొద్ది గంటల్లోనే, రాష్ట్రంలో ‘బుల్డోజర్’ చర్యలు ప్రారంభమైనట్లు సమాచారం.
సోషల్ మీడియాలో పలు వీడియోలు వైరల్ అవుతున్నాయి, వాటిలో బుల్డోజర్లు వివిధ కట్టడాలను కూల్చివేస్తుండటం కనిపిస్తోంది. చారిత్రక హాగ్ మార్కెట్ (Hogg Market) ప్రాంతంలోని తృణమూల్ కాంగ్రెస్ (TMC) యూనియన్ కార్యాలయాన్ని లక్ష్యంగా చేసుకుని ఈ కూల్చివేతలు జరిగాయని ఆరోపణలు వస్తున్నాయి. ఈ ఘటనలతో వ్యాపారులు భయాందోళనకు గురై తమ దుకాణాలను మూసివేశారు. మహువా మోయిత్రా, సాగరికా ఘోష్ వంటి టీఎంసీ నేతలు ఈ వీడియోలను పంచుకుంటూ బీజేపీపై విమర్శలు గుప్పించారు.
న్యూ మార్కెట్ పరిసరాల్లో ఉద్రిక్తత
న్యూ మార్కెట్ ప్రాంతంలోని టీఎంసీ యూనియన్ కార్యాలయాన్ని పూర్తిగా కూల్చివేసినట్లు నివేదికలు చెబుతున్నాయి. కోల్కతాలోని అత్యంత రద్దీగా ఉండే ఈ వాణిజ్య కేంద్రంలో పరిస్థితి ఉద్రిక్తంగా మారడంతో పోలీసులు భారీగా మోహరించారు. భయాందోళనకు గురైన వ్యాపారులు షాపులు మూసివేసి అక్కడి నుండి వెళ్లిపోయారు. పరిస్థితిని అదుపులోకి తెచ్చేందుకు పోలీసులు నిరంతరం గస్తీ నిర్వహిస్తున్నారు.
మహువా మోయిత్రా, డెరెక్ ఓబ్రెయిన్ విమర్శలు
టీఎంసీ నేత మహువా మోయిత్రా ‘X’ లో వీడియోను షేర్ చేస్తూ.. కోల్కతా న్యూ మార్కెట్ సాక్షిగా బెంగాలీలు బీజేపీ నినాదమైన ‘పరివర్తన్’ (మార్పు)ను అనుభవిస్తున్నారని ఎద్దేవా చేశారు. మరో సీనియర్ నేత డెరెక్ ఓబ్రెయిన్ మాట్లాడుతూ.. ప్రభుత్వ పర్యవేక్షణలోనే ఈ కూల్చివేతలు జరిగాయని, విజయ సంబరాల్లో భాగంగా మాంసం దుకాణాలను కూడా కూల్చివేశారని ఆరోపించారు. “ఇదే బీజేపీ అసలు నైజం, ప్రపంచం ఈ దృశ్యాలను చూడాలి” అని ఆయన పేర్కొన్నారు.
స్థానికుల భిన్నమైన వాదనలు
అయితే, స్థానిక నివాసితులు మరియు కొందరు వ్యాపారులు ఈ ఆరోపణలను తోసిపుచ్చారు. ఆ కట్టడం అక్రమంగా నిర్మించినదని వారు వాదిస్తున్నారు. గతంలో ఒక దుకాణదారుడి నుండి బలవంతంగా లాక్కున్న స్థలంలోనే ఈ యూనియన్ కార్యాలయాన్ని ఏర్పాటు చేశారని వారు ఆరోపించారు.
ప్రతిఘటన తప్పదు: టీఎంసీ
“ఈరోజు దుకాణాలను లక్ష్యంగా చేసుకున్నారు, రేపు రాజకీయ ప్రత్యర్థులను, ఆపై బెంగాల్ మహనీయుల విగ్రహాలను, చివరకు పేదల ఇళ్లను కూల్చుతారు. కానీ బెంగాల్లో బీజేపీ బుల్డోజర్ ఎక్కడికి వెళ్లినా.. అక్కడ ప్రతిఘటన అనే గోడను ఎదుర్కోవాల్సి ఉంటుంది. ఈ ప్రభుత్వ ప్రేరేపిత ఉగ్రవాద విధానంపై మేము పోరాడుతాము” అని టీఎంసీ హెచ్చరించింది.