“బ్యాంకులో సహాయం చేయడానికి వచ్చిన వ్యక్తి.. చివరకు రూ. 1.25 లక్షలు కాజేసిన షాకింగ్ ఘటన.! మహిళను వేరే ఫారం తీసుకురావడానికి పంపి చేసిన వినూత్న మోసం. సీసీటీవీ దృశ్యాలను పరిశీలించి అగంతకుడి కోసం పోలీసుల గాలింపు.!”

హర్యానా రాష్ట్రం జింద్ జిల్లాలోని సఫిదోన్ పట్టణంలో ఉన్న ఎస్బీఐ (SBI) బ్యాంకులో, ఓ యువతికి సహాయం చేస్తున్నట్లు నటించి రూ.1.25 లక్షల నగదును ఓ గుర్తుతెలియని వ్యక్తి అపహరించిన ఘటన తీవ్ర కలకలం రేపుతోంది.

డబ్బు డిపాజిట్ చేయడానికి ఫారం (చలానా) నింపడంలో సహాయం అడిగిన యువతి దగ్గర, ఆ వ్యక్తి అకౌంట్ నంబర్‌లోని ఒక అంకెను రహస్యంగా తప్పుగా రాసినట్లు సమాచారం.

ఆ తర్వాత సదరు యువతి, తప్పుగా రాసిన అకౌంట్ నంబర్‌తో ఉన్న ఫారాన్ని, రూ.1.25 లక్షల నగదును బ్యాంకు కౌంటర్‌లో ఇచ్చింది. కంప్యూటర్‌లో ఖాతా సంఖ్య తప్పుగా ఉన్నట్లు చూపించడంతో, క్యాషియర్ ఈ విషయాన్ని ఆ యువతికి తెలిపాడు. అప్పుడు పక్కనే ఉన్న ఆ గుర్తుతెలియని వ్యక్తి, సరైన అకౌంట్ నంబర్ రాయడం కోసం వేరే కొత్త ఫారం తీసుకురావాలని ఆ యువతితో చెప్పాడు.

ఆ యువతి కొత్త ఫారం తీసుకురావడానికి వెళ్లిన సమయాన్ని ఆసరాగా చేసుకున్న ఆ అగంతకుడు, అప్పటికే కౌంటర్‌లో ఇచ్చిన ఫారాన్ని, రూ.1.25 లక్షల నగదును క్యాషియర్ వద్ద నుంచి వెనక్కి తీసుకుని అక్కడి నుంచి చాకచక్యంగా పరారైనట్లు పోలీసులు తెలిపారు. కొద్దిసేపటికి కొత్త ఫారంతో తిరిగి వచ్చిన యువతితో.. ఆమెతో పాటు వచ్చిన వ్యక్తే డబ్బు తీసుకువెళ్లాడని క్యాషియర్ చెప్పడంతో అప్పుడు జరిగిన మోసం ఆమెకు తెలిసింది.

దీంతో బాధితురాలు సఫిదోన్ పోలీస్ స్టేషన్‌లో ఫిర్యాదు చేసింది. ఈ ఘటనపై పోలీసులు బ్యాంకులోని సీసీటీవీ ఫుటేజీలను పరిశీలించి, డబ్బు తీసుకుని పరారైన గుర్తుతెలియని వ్యక్తి కోసం గాలిస్తున్నారు. సహాయం చేస్తున్నట్లు నటించి, బ్యాంకు లోపలే డబ్బు కాజేసిన ఈ ఘటన ఆ ప్రాంతంలో తీవ్ర చర్చనీయాంశమైంది.