ఢిల్లీలోని జామా మసీదు మెట్రో స్టేషన్‌లో భద్రతా తనిఖీల సమయంలో అనుమానాస్పదంగా ప్రవర్తించిన ఒక ప్రయాణికుడిని కేంద్ర పారిశ్రామిక భద్రతా దళం (CISF) జవాన్లు చాకచక్యంగా పట్టుకుని ఢిల్లీ పోలీసులకు అప్పగించారు.
ప్రయాణికుల లగేజీని ఎక్స్-రే స్కానింగ్ యంత్రం ద్వారా తనిఖీ చేస్తున్న సమయంలో, సదరు వ్యక్తి బ్యాగ్‌లో అత్యంత సాంద్రత కలిగిన అనుమానాస్పద పదార్థం ఉన్నట్లు భద్రతా సిబ్బంది గుర్తించారు. ఆ వెంటనే ఆ ప్రయాణికుడు అక్కడి నుంచి తప్పించుకుని పారిపోయేందుకు యత్నించాడు. అప్రమత్తమైన భద్రతా సిబ్బంది వెంటనే అతడిని వెంబడించి, మెట్రో స్టేషన్ ఎగ్జిట్ గేట్ వద్ద అదుపులోకి తీసుకున్నారు.
అనంతరం ఆ వ్యక్తిని, అతని వస్తువులను క్షుణ్ణంగా తనిఖీ చేయగా.. అతడి లోదుస్తులలో ప్రత్యేకంగా కుట్టిన అరలో గుర్తుతెలియని సెమీ-సాలిడ్ (పేస్ట్ లేదా జిగురు వంటి) పదార్థాన్ని దాచినట్లు గుర్తించామని సీఐఎస్ఎఫ్ వెల్లడించింది. విచారణలో ఆ వ్యక్తి తాను మలేషియాలోని కౌలాలంపూర్‌లో నివసిస్తున్న ప్రవాస భారతీయుడినని చెప్పుకొచ్చాడు. అయితే అతడి వద్ద లభ్యమైన ఆ పదార్థం ఏమిటి, దాన్ని ఎందుకు అంత రహస్యంగా దాచిపెట్టాడు అనే విషయాలు వెంటనే స్పష్టంగా తెలియరాలేదు. తదుపరి విచారణ నిమిత్తం నిందితుడిని, స్వాధీనం చేసుకున్న వస్తువులను స్థానిక ఢిల్లీ పోలీసులకు అప్పగించారు.
మెట్రో స్టేషన్లలో ప్రయాణికుల భద్రతను నిర్ధారించేందుకు నిర్వహించే నిఘా తనిఖీల ప్రాముఖ్యతను ఈ ఘటన మరోసారి గుర్తుచేసింది. స్కానింగ్ మెషీన్‌లో అనుమానాస్పద వస్తువు కనిపించగానే తప్పించుకోవాలని చూసినప్పటికీ.. భద్రతా సిబ్బంది వెంటనే స్పందించి అతడిని బంధించారు. స్వాధీనం చేసుకున్న ఆ పదార్థం స్వభావం, దాన్ని దాచి ఉంచడానికి గల కారణం, ఈ వ్యవహారం వెనుక ఉన్న అసలు కుట్రపై పోలీసులు అన్ని కోణాల్లో లోతుగా దర్యాప్తు చేస్తున్నారు.
Leave a Reply