బెంగళూరు: రాష్ట్ర రాజధాని బెంగళూరులో ‘లక్కీ భాస్కర్’ సినిమా స్టైల్‌లో ఒక బ్యాంక్ మేనేజర్ కస్టమర్ల నుంచి కోట్ల రూపాయలు కాజేసిన ఘటన వెలుగులోకి వచ్చింది. ఒక జాతీయ బ్యాంక్ మేనేజరే ఈ ఘాతుకానికి పాల్పడటం గమనార్హం. మోసపోయిన ఖాతాదారులు సదరు మేనేజర్‌ను వెంటనే అరెస్ట్ చేసి కఠిన చర్యలు తీసుకోవాలని డిమాండ్ చేస్తున్నారు.
మల్లేశ్వరం 15వ క్రాస్‌లో ఉన్న కెనరా బ్యాంక్ సీనియర్ మేనేజర్ ఎన్. రఘుపై ఈ మోసం ఆరోపణలు వచ్చాయి. బ్యాంక్‌లోని 41 మంది ఖాతాదారుల పేరుతో నకిలీ గోల్డ్ లోన్ అకౌంట్లు తెరిచి, దాదాపు 3.11 కోట్ల రూపాయల మేర మోసానికి పాల్పడ్డాడు. వృద్ధులు, పెన్షన్ దారులు, అర్చకులు మరియు వ్యాపారులనే ఈ మేనేజర్ టార్గెట్ చేసినట్లు సమాచారం. వీరి నుంచి ఓటీపీ (OTP)లు మరియు సంతకం చేసిన చెక్కులను సేకరించి ఈ భారీ కుంభకోణానికి తెరలేపాడు.
మోసం జరిగిన తీరు: బ్యాంక్‌లో అకౌంట్ ఉన్న కస్టమర్ల నుంచి ఓటీపీలు, చెక్కులు తీసుకున్న మేనేజర్, వారికి తెలియకుండానే వారి పేర్ల మీద గోల్డ్ లోన్ అకౌంట్లు తెరిచేవాడు. ఆ తర్వాత ఆ లోన్ మొత్తాన్ని తన ఖాతాలకు బదిలీ చేసుకునేవాడు. ఇలా మొత్తం 41 మంది కస్టమర్లను మోసం చేసి వారికి కుచ్చుటోపీ పెట్టాడు. తమ డబ్బు పోయిందని తెలుసుకున్న బాధితులు బ్యాంక్ ముందు గుమిగూడి తమకు న్యాయం చేయాలని ఆందోళన చేపట్టారు.