బెంగళూరు నగరంలో ఇల్లు వెతుక్కోవడం అంటే ఒక యుద్ధం చేయడమే. తాజాగా ఓ యువతికి ఎదురైన అనుభవం ఇప్పుడు సోషల్ మీడియాలో హాట్ టాపిక్ అయింది. కేవలం గంటన్నర సమయం అడిగినందుకు చేతికి అందాల్సిన ఇల్లు వేరే వాళ్ల పాలవ్వడంతో, ఆమె తన ఆవేదనను వెళ్లగక్కారు.
ఒక్క గంటలో సీన్ మారిపోయింది!
బెంగళూరుకు కొత్తగా వచ్చిన @namma_rants అనే ఇన్‌స్టాగ్రామ్ యూజర్, తన ఇంటి వేటలో ఎదురైన చేదు అనుభవాన్ని ఒక వీడియో రూపంలో పంచుకున్నారు. ఆమె మాటల్లోనే..
“జీవితంలో ఎవరినైనా కోల్పోవడం కంటే, నచ్చిన ఇల్లు దక్కకపోవడం ఎక్కువ బాధను కలిగిస్తుందని నాకు ఇప్పుడే అర్థమైంది. ఇది జోక్ కాదు, దాదాపు నెల రోజులుగా వెతుకుతుంటే ఈ రోజు ఒక 1BHK ఇల్లు నచ్చింది. అద్దె విషయంలో నేను ఎన్నో సర్దుబాట్లు చేసుకున్నాను, కానీ యజమాని మాత్రం ఒక్క రూపాయి కూడా తగ్గలేదు.”
ఆమె ఇంటిని చూసిన తర్వాత, అడ్వాన్స్ డబ్బులు చెల్లించే ముందు కేవలం ఒక గంట సమయం కావాలని యజమానిని కోరారు. తీరా గంటన్నర తర్వాత ఫోన్ చేస్తే, అప్పటికే ఆ ఇల్లు వేరే వాళ్లకు అద్దెకు ఇచ్చేసినట్లు యజమాని సమాధానం ఇచ్చారు.
“గుండె పగిలినంత పనైంది”
“నేను మళ్ళీ ఫోన్ చేసి అడ్వాన్స్ ఇస్తానని చెప్పగానే.. ‘ఇల్లు అయిపోయింది (రెంట్ కి ఇచ్చేశాం)’ అని ఆ అన్న (యజమాని) చెప్పారు. షాక్ అయ్యాను! గంట ముందే కదా చూసింది అంటే.. ఎవరో అప్పుడే అడ్వాన్స్ ఇచ్చేశారని చెప్పారు. ఉదయం నుండి నా మనసు అస్సలు బాలేదు. రేపటి నుండి మళ్ళీ మొదటికే మోసం.. ఇల్లు వెతకడం ప్రారంభించాలి” అని ఆమె ఆవేదన వ్యక్తం చేశారు.
ఆమె తన పోస్ట్‌కు “బిగ్ బాస్.. నాకు చాలా బాధగా ఉంది” అనే క్యాప్షన్ ఇచ్చారు. గరుడాచార్‌పాళ్య పరిసరాల్లో తనకు ఒక ఇల్లు కావాలని నెటిజన్ల సహాయం కోరారు.
నెటిజన్ల స్పందన
ఈ వీడియోపై నెటిజన్లు రకరకాలుగా స్పందిస్తున్నారు:
- “బెంగళూరులో రెప్పపాటులో ఫ్లాట్లు మాయమైపోతాయి, ఇది నిజం!” అని ఒకరు కామెంట్ చేయగా..
- “బ్రేక్-అప్ కంటే ఈ బాధ వర్ణనాతీతం, నేను కూడా ఇలాంటి పరిస్థితిని ఎదుర్కొన్నాను” అని మరొకరు తన గోడు వెళ్లగక్కారు.
మొత్తానికి ఐటీ సిటీలో ఇల్లు దొరకడం అంటే, లక్ ఉండటంతో పాటు మెరుపు వేగంతో నిర్ణయం తీసుకోవాలని ఈ ఘటన మరోసారి నిరూపించింది.