బీహార్ వార్తలు: గయా జిల్లా సివిల్ లైన్ పోలీస్ స్టేషన్ పరిధిలో ఒక గంభీరమైన ఉదంతం వెలుగులోకి వచ్చింది. వివాహమైన ఏడేళ్ల తర్వాత ఒక ముస్లిం మహిళ తన భర్త నుండి విడాకులు తీసుకోవాలని నిర్ణయించుకుంది. తన భర్త శారీరక అవసరాలను తీర్చలేకపోతున్నాడని, మానసిక ఆరోగ్య పరిస్థితి కూడా సరిగ్గా లేదని ఆమె ఆరోపిస్తోంది. వివాహానికి ముందే ఈ విషయాలను తన దగ్గర దాచారని ఆమె పేర్కొంది. దీనిపై ఆమె బీహార్ రాష్ట్ర మహిళా కమిషన్‌కు ఫిర్యాదు చేసింది.
మొదటి రాత్రి నుండే సమస్యలు: బాధితురాలి కథనం ప్రకారం.. ఏడేళ్ల క్రితం ఆమెకు వివాహమైంది. పెళ్లయిన మొదటి రాత్రి కూడా భర్త తనతో మాట్లాడలేదని, శారీరక సంబంధం పెట్టుకోలేదని ఆమె తెలిపింది. కొన్నాళ్ల తర్వాత ఆమె పుట్టింటికి వెళ్ళిపోయినా, భర్త ఆమెను పిలవడానికి రాలేదు. అత్తగారింటికి వెళ్ళినప్పుడు తన భర్త మానసిక స్థితి బలహీనంగా ఉందని తన తోడికోడలు (జెఠాని) ద్వారా తెలిసిందని ఆమె చెప్పింది. భర్త మందులు వాడితేనే శారీరక సంబంధం ఏర్పడేదని, చాలాసార్లు ప్రయత్నించినా విఫలమవడంతో తాను మానసిక వేదనకు గురయ్యానని, ఆత్మహత్య ఆలోచనలు కూడా వచ్చాయని ఆవేదన వ్యక్తం చేసింది.
పిల్లలు పుట్టినా మారని పరిస్థితి: వివాహమైన ఏడాదికి ఆమె ఒక కుమారుడికి జన్మనిచ్చింది. బిడ్డ పుట్టిన తర్వాత పరిస్థితి మారుతుందని ఆశించినా, భర్త ప్రవర్తనలో ఎలాంటి మార్పు రాలేదు. అత్తగారింట్లో కూడా వేధింపులు ఎదురయ్యాయి. ఒకానొక దశలో మదర్సాలో ఇరుపక్షాల మధ్య రాజీ కుదిరినప్పటికీ, కొద్దిరోజులకే పాత కథే పునరావృతమైంది. భర్త బాధ్యతలు నిర్వర్తించకపోవడంతో విసిగిపోయిన ఆమె, విడాకులు తీసుకోవాలని నిశ్చయించుకుంది.
భర్త వాదన: అయితే, తాను భార్యకు విడాకులు ఇవ్వడం ఇష్టం లేదని భర్త చెబుతున్నాడు. తాను కొడుకును చూడటానికి వెళ్తే, భార్య పోలీసులతో పట్టిస్తానని బెదిరించిందని ఆరోపిస్తున్నాడు. తాను ప్రస్తుతం మెడికల్ షాపు పెట్టే ప్రయత్నంలో ఉన్నానని, ఆదాయం పెరిగితే అంతా సర్దుకుంటుందని అంటున్నాడు.
ఫిబ్రవరి 2న తదుపరి విచారణ: బీహార్ రాష్ట్ర మహిళా కమిషన్ అధ్యక్షురాలు అప్సరా మిశ్రా ఈ విషయంపై స్పందిస్తూ.. ఇరుపక్షాలకు కౌన్సెలింగ్ ఇచ్చామని తెలిపారు. వీరికి ఒక కుమారుడు ఉన్నందున, కుటుంబాన్ని కాపాడుకోవడానికి ప్రయత్నించాలని సూచించారు. తదుపరి విచారణ ఫిబ్రవరి 2వ తేదీకి వాయిదా వేశారు.