భారతీయులకు బంగారం అంటే కేవలం ఒక లోహం మాత్రమే కాదు; అది ఒక కరెన్సీ, ఆర్థిక భద్రత, హోదా మరియు భావోద్వేగాలతో ముడిపడి ఉన్న విషయం. అయితే, నేటి తరం నెమ్మదిగా బంగారానికి దూరమవ్వడానికి కారణమేమిటి?
ధనవంతులు పెళ్లిళ్లలో బంగారంతో మెరిసిపోతుంటే, చాలా మంది నగర మరియు గ్రామీణ ప్రాంతాల జంటలు పెళ్లి నగలకు భారీగా ఖర్చు చేయడానికి వెనుకాడతున్నారు. తమ వివాహ వేడుకలకు బంగారం ధరించకుండా ఇతర లోహాలతో చేసిన ఆభరణాలను ఉపయోగిస్తున్నారు.
చాలా మంది ఇప్పుడు తక్కువ బంగారం లేదా అసలు బంగారం లేని పెళ్లిళ్లను ఇష్టపడుతున్నారు. దీనికి బదులుగా ‘మినిమలిస్ట్’ ఆభరణాలు, ప్రత్యామ్నాయ లోహాలను ఎంచుకుంటున్నారు. పెళ్లిళ్లు ఎందుకు చేసుకుంటాం అనే ఉద్దేశాన్నే మార్చేసే కొత్త శైలి ఇప్పుడు ప్రాచుర్యం పొందుతోంది. బంగారం లేకుండా పెళ్లి చేసుకుంటే వివాహం యొక్క అసలైన అర్థానికి, భావాలకు ఎక్కువ ప్రాముఖ్యత లభిస్తుందని భావించేవారు పెరుగుతున్నారు. ప్రదర్శన కోసం బంగారం వద్దు అనుకోవడం వల్ల సమాజంలో అనవసరమైన ఒత్తిడి తగ్గుతుందని కూడా కొందరు అభిప్రాయపడుతున్నారు.
ఇటీవల కొచ్చికి చెందిన మనోజ్ కృష్ణన్ తాను వెళ్లిన ఒక పెళ్లి గురించి ఫేస్బుక్లో రాశారు. పెళ్లిలో బంగారు ఆభరణాలు ధరించకుండా, దుస్తులకు తగ్గట్టుగా స్టైలిష్ జ్యువెలరీ ధరించడం కొత్త ట్రెండ్గా మారిందని ఆయన వివరించారు.
అవును, ప్రస్తుతం బంగారం ధరలు ఆకాశాన్నంటుతున్న సమయంలో, పెళ్లి కోసం లక్షలాది రూపాయలు ఖర్చు చేసి బంగారం కొనడానికి బదులు, ఆ డబ్బును వధూవరుల భవిష్యత్తు అవసరాలకు ఉపయోగించాలనే ఆలోచన పెరుగుతోంది. ఈ ‘కాస్ట్యూమ్ ఆభరణాలను’ సాధారణంగా ఇత్తడి, రాగి లేదా మిశ్రమ లోహాలతో తయారు చేస్తారు. వీటిపై వెండి, బంగారం, రోజ్ గోల్డ్ లేదా బ్లాక్ రేడియం కోటింగ్ ఉంటుంది. ఇవి రాళ్లతో పొదగబడి అందంగా కనిపిస్తాయి.
చాలా మంది బంగారం లేని పెళ్లిని ‘ఆర్థిక పొదుపు’గా భావిస్తున్నారు. ఇతరులను మెప్పించడానికి ఆడంబరాలు చేసే బదులు, ఆ డబ్బును ఉన్నత విద్య, ఇల్లు కొనడం లేదా పెట్టుబడులకు ఉపయోగించవచ్చని అభిప్రాయపడుతున్నారు. గత నెలలో వివాహం చేసుకున్న దీప్తి మరియు శ్యామ్ కృష్ణ మాట్లాడుతూ, “కేవలం ప్రదర్శన కోసం బంగారంపై అంత డబ్బు ఖర్చు చేసే బదులు ఆర్థిక భద్రత గురించి ఆలోచించాలి. మిగిలిన డబ్బుతో ఆస్తులు కొనవచ్చు లేదా ప్రయాణాలు చేయవచ్చు. భవిష్యత్తు కోసం దాచుకోవచ్చు” అని అన్నారు.
కొన్నేళ్ల క్రితం బంగారం లేకుండా వివాహం చేసుకున్న గుజరాత్కు చెందిన దివ్య అభిప్రాయం ప్రకారం, “కోవిడ్ సంక్షోభం తర్వాత పోటీతత్వం మరియు వేగవంతమైన జీవనశైలిని చూస్తున్నాం. ఎంత పెట్టుబడి పెట్టినా చేతిలో కొంత నగదు ఉండాలని దంపతులు కోరుకుంటున్నారు. క్లిష్ట పరిస్థితుల్లో డబ్బు అవసరమని అందరూ గుర్తించారు.”
బంగారు ఆభరణాలు లేకుండా నిరాడంబరంగా పెళ్లి చేసుకోవడం సంప్రదాయ ఆడంబరాన్ని తగ్గిస్తుంది. అయితే బంధువులు, స్నేహితుల మధ్య దీన్ని పూర్తిగా ప్రదర్శించడం అందరికీ ఇష్టం ఉండదు. నాలుగైదు ఏళ్ల క్రితం బంగారం లేకుండా దుస్తులకు తగ్గట్టుగా నగలు ధరించి పెళ్లి చేసుకున్న నయన మాట్లాడుతూ, “పెళ్లిలో బంగారు కమ్మలు కూడా ధరించలేదు. అలా అని ఎవరికీ మేము బంగారం లేకుండా పెళ్లి చేసుకుంటున్నామని చెప్పలేదు. కానీ బంగారం కోసం లక్షలాది రూపాయలు తగలేయాల్సిన అవసరం లేదనే ఆలోచన మాకు మొదటి నుంచే ఉంది” అని చెప్పారు.
మమత అనే మహిళ తన అభిప్రాయం వ్యక్తపరుస్తూ, “డబ్బు వచ్చిందంటే బంగారం కొను, అది భవిష్యత్తుకు పనికొస్తుంది అని మా ఇంట్లోని పెద్దలు ఇప్పటికీ చెబుతుంటారు. నేను చిన్నప్పటి నుండి చూస్తున్నాను, బంగారం ఉంటే అది ఒక ప్రతిష్ట. పెళ్లి, పండుగ ఏదైనా సరే అది ఉండాల్సిందే. అయితే, ఎప్పుడైతే మధ్యతరగతి ప్రజలకు బంగారం కొనే శక్తి తగ్గిందో, అప్పుడే ఈ ‘రోల్డ్ గోల్డ్’ హడావిడి మొదలైంది. ఇప్పుడు ట్రెండ్ అవుతున్న రోల్డ్ గోల్డ్ ఆభరణాలను మా అమ్మ ‘గ్యారెంటీ నగలు’ అని పిలిచేది. అప్పట్లో వీధుల్లో అమ్మే మహిళల దగ్గర బేరమాడి తక్కువ ధరకు కొనేవారు. ఇప్పుడు అంతా ఆన్లైన్లో దొరుకుతోంది. అంతేకాకుండా, ఇలాంటి నగలకు ఇప్పుడు మాల్స్ మరియు పెద్ద బ్రాండ్లు కూడా వచ్చాయి” అని అన్నారు.
ఆమె ప్రకారం, “ఒకప్పుడు మధ్యతరగతి ప్రజలు డబ్బు లేక రోల్డ్ గోల్డ్ ధరించేవారు. కానీ ఇప్పుడు ధనవంతులు కూడా బంగారం ఎందుకు వేస్ట్ అని భావించి కమర్షియల్ ప్రాపర్టీలు, ఫ్లాట్లు లేదా ప్లాటినం మీద పెట్టుబడి పెడుతున్నారు. అయితే ఇప్పటికీ మధ్యతరగతి మరియు పేద కుటుంబాలకు బంగారం అనేది ఒక ముఖ్యమైన పెట్టుబడి ఆయుధమే.”
గతేడాది బంగారం లేకుండా పెళ్లి చేసుకున్న సపన మాట్లాడుతూ, “బంగారం వాడే పెళ్లి చేయాలనే పద్ధతి ప్రస్తుతం ఉంది. కానీ ఇది ఇలాగే కొనసాగకూడదు. ఈ పద్ధతి ఆగితే మంచిది. బంగారం కొనడానికి అందరికీ శక్తి ఉండదు. పెళ్లి చేయాలంటే కనీసం 5 లేదా 10 గ్రాములైనా బంగారం వేయాలని అంటారు. దానికి ఇప్పుడు లక్షలాది రూపాయలు ఖర్చు చేయాలి. ఇది చాలా కష్టం. కాబట్టి, బంగారం లేకపోయినా నిరాడంబరంగా పెళ్లి చేసుకుని, అందంగా జీవించవచ్చు అనే ఆలోచన అందరిలో రావాలి” అని ఆకాంక్షించారు.