ఢిల్లీలో జరుగుతున్న ‘AI ఇంపాక్ట్ సమ్మిట్ 2026’లో భారతీయ GI కాఫీ అందరి దృష్టిని ఆకర్షించింది. ప్రపంచస్థాయి టెక్ నిపుణులు, పారిశ్రామికవేత్తలు మరియు కేంద్ర మంత్రులు ఈ కాఫీ రుచిని ఆస్వాదించారు.
GI కాఫీ అంటే నిర్దిష్ట భౌగోళిక ప్రాంత గుర్తింపు పొందిన ఉత్పత్తులలో ఒకటి. దీని నాణ్యత, తీపి మరియు సువాసన అది పండే నేల మరియు వాతావరణంపై ఆధారపడి ఉంటాయి. గూగుల్ సీఈఓ సుందర్ పిచాయ్ ఈ కాఫీని రుచి చూడగా, తాజాగా కేంద్ర మంత్రి అశ్విని వైష్ణవ్ కూడా కాఫీ తాగుతున్న వీడియోను షేర్ చేశారు.
భారత్ GI, UPI మరియు AI: కేంద్ర మంత్రి అశ్విని వైష్ణవ్ ఇన్‌స్టాగ్రామ్‌లో ఒక రీల్‌ను షేర్ చేశారు. అందులో ఆయన వివిధ ప్రాంతాల GI కాఫీలను కొనుగోలు చేస్తూ, యూపీఐ (UPI) ద్వారా పేమెంట్ చేస్తూ కనిపించారు. ఈ వీడియోకు ఆయన “భారత్ GI, UPI మరియు AI” అని క్యాప్షన్ ఇచ్చారు. డీపీఐఐటీ (DPIIT) పరిధిలో ప్రారంభమైన ఈ ‘భారత్ GI’ చొరవ ఉద్దేశం.. మన దేశపు విశిష్ట ఉత్పత్తులకు అంతర్జాతీయ స్థాయిలో ప్రీమియం మార్కెటింగ్ కల్పించడం.
సుందర్ పిచాయ్ స్పందన: గురువారం జరిగిన సమ్మిట్ సందర్భంగా సుందర్ పిచాయ్ భారతీయ GI కాఫీని రుచి చూశారు. ఒక సిప్ తీసుకున్న తర్వాత ఆయన “Wow!” అంటూ తన ఆశ్చర్యానందాలను వ్యక్తం చేశారు. దీనిపై కేంద్ర వాణిజ్య శాఖ మంత్రి పీయూష్ గోయల్ స్పందిస్తూ.. “సుందర్ పిచాయ్ స్వయంగా వచ్చి రుచి చూశారంటేనే ఈ కాఫీ ఎంత ప్రత్యేకమైనదో అర్థం చేసుకోవచ్చు. ప్రపంచం నేడు భారతీయ GI కాఫీ రుచితో పాటు భారత్ ఎదుగుదలను కూడా గమనిస్తోంది” అని ట్వీట్ చేశారు.