బ్యాంకాక్: థాయ్లాండ్ పర్యటనకు వెళ్లాలనుకునే భారతీయులకు ఇది చేదు వార్త. భారతీయ పర్యాటకులకు ఇప్పటివరకు కల్పిస్తున్న ‘వీసా-రహిత ప్రవేశం’ (Visa-Free Entry) సౌకర్యాన్ని థాయ్లాండ్ ప్రభుత్వం రద్దు చేసింది. 2024 నుండి అందుబాటులో ఉన్న ఈ సౌకర్యాన్ని నిలిపివేస్తూ థాయ్ కేబినెట్ కీలక నిర్ణయం తీసుకుంది.
ఏమిటి ఈ మార్పు? మే 19న థాయ్ కేబినెట్ ఆమోదించిన నిబంధనల ప్రకారం, భారత్ ఇకపై ‘వీసా-రహిత’ జాబితాలో ఉండదు. దీనికి బదులుగా, భారత్ ఇప్పుడు ‘వీసా ఆన్ అరైవల్’ (Visa on Arrival – VoA) వర్గంలోకి వస్తుంది. పర్యాటక రంగాన్ని ప్రోత్సహించడానికి గతంలో ప్రవేశపెట్టిన 60 రోజుల వీసా-రహిత పాలసీని థాయ్ ప్రభుత్వం సమీక్షించి, భద్రతా కారణాల దృష్ట్యా ఈ మార్పులు చేసింది.
భారత్ ఇప్పుడు ఏ జాబితాలో ఉంది? కొత్త నిబంధనల ప్రకారం, థాయ్లాండ్ ప్రభుత్వం దేశాలను వివిధ వర్గాలుగా విభజించింది:
- వీసా-రహిత వర్గం: అమెరికా, యూకే, జపాన్, ఆస్ట్రేలియా, సింగపూర్ వంటి 54 దేశాలకు 30 రోజుల వీసా-రహిత ప్రవేశం కల్పించారు.
- కొత్త VoA వర్గం: ఈ వర్గంలోకి ఇప్పుడు భారత్తో పాటు అజర్బైజాన్, బెలారస్ మరియు సెర్బియా దేశాలను చేర్చారు.
నిబంధనలు ఎప్పటి నుండి అమల్లోకి వస్తాయి? ఈ మార్పులు థాయ్లాండ్ ‘రాయల్ గెజిట్’ (Royal Gazette)లో ప్రచురితమైన 15 రోజుల తర్వాత నుండి అమల్లోకి వస్తాయి. ఇప్పటికే పాత నిబంధనల ప్రకారం థాయ్లాండ్లో ఉన్నవారు లేదా కొత్త నిబంధనలు అమల్లోకి రాకముందే ప్రయాణం ప్లాన్ చేసుకున్న వారు, తమ అనుమతి గడువు ముగిసే వరకు అక్కడే ఉండవచ్చు. కొత్తగా వెళ్లేవారు ‘ఈ-వీసా’ (E-Visa) ద్వారా లేదా ‘వీసా ఆన్ అరైవల్’ పద్ధతిలో దరఖాస్తు చేసుకోవాల్సి ఉంటుంది.
ఎందుకు ఈ కఠిన నిర్ణయం? 2024 జూలైలో పర్యాటకాన్ని పెంచే లక్ష్యంతో వీసా-రహిత ప్రవేశాన్ని సులభతరం చేసినప్పటికీ, కొద్ది కాలంలోనే థాయ్లాండ్లో విదేశీయుల ద్వారా జరుగుతున్న అక్రమ కార్యకలాపాలు పెరిగాయి. డ్రగ్స్, సెక్స్ ట్రాఫికింగ్ మరియు అనుమతి లేకుండా వ్యాపారాలు చేస్తున్నారన్న ఫిర్యాదుల నేపథ్యంలో, భద్రతా కారణాల రీత్యా థాయ్ ప్రభుత్వం వీసా నిబంధనలను కఠినతరం చేసింది.