“భారతీయులను చంపాలి!”.. అమెరికాలో హిందూ ఆలయంపై దాడికి కుట్ర? 19 ఏళ్ల యువకుడి అరెస్ట్.. సోదాల్లో బయటపడ్డ సంచలన విషయాలు!

అమెరికాలో హిందూ ఆలయాన్ని లక్ష్యంగా చేసుకుని భారీ కాల్పులకు కుట్ర పన్నినట్లు ఆరోపణలు ఎదుర్కొంటున్న 19 ఏళ్ల యువకుడిని పోలీసులు అరెస్ట్ చేసినట్లు సమాచారం. ఈ ఘటన అమెరికాలోని ఇల్లినాయిస్ రాష్ట్రంలో చోటుచేసుకున్నట్లు తమిళ వార్తా కథనం పేర్కొంది.

అధునాతన తుపాకులు, భారీగా బుల్లెట్లు స్వాధీనం?

ఈ కేసులో అలెగ్జాండ్రోస్ పపోరాకిస్ అనే యువకుడిని అరెస్ట్ చేసినట్లు కథనంలో వెల్లడించారు. అతడి వద్ద నుంచి అధునాతన తుపాకులు, పెద్ద సంఖ్యలో బుల్లెట్లు, సైనిక అవసరాలకు ఉపయోగించే పరికరాలను స్వాధీనం చేసుకున్నట్లు దర్యాప్తు అధికారులు తెలిపినట్లు సమాచారం.

వివక్షపూరిత భావజాలంతో దాడికి ప్రణాళిక?

స్థానిక రెస్టారెంట్‌లో క్యాషియర్‌గా పనిచేస్తున్న ఈ యువకుడు శ్వేతజాతి ఆధిపత్య భావజాలానికి మద్దతు ఇచ్చినట్లు దర్యాప్తులో వెల్లడైందని కథనం పేర్కొంది. భారతీయ సంతతికి చెందినవారితో పాటు ఇతర మైనారిటీలను లక్ష్యంగా చేసుకుని, “నేను ఎందుకు పోరాడాను” అనే శీర్షికతో ఓ పత్రాన్ని రూపొందించినట్లు ఆరోపణలు ఉన్నాయి. అందులో హింసను ప్రేరేపించే అంశాలు, జాతి విద్వేషానికి సంబంధించిన ప్రణాళికలు ఉన్నట్లు అధికారులు గుర్తించినట్లు సమాచారం.

రహస్య సమాచారంతో బయటపడిన కుట్ర?

ఓ వ్యక్తి అందించిన రహస్య సమాచారం ఆధారంగా పలు పోలీసు విభాగాలు కలిసి దర్యాప్తు చేపట్టి, దాడి కుట్రను ముందుగానే అడ్డుకున్నట్లు కథనం వెల్లడించింది. నిందితుడిని కోర్టులో హాజరుపరిచిన అనంతరం అక్టోబర్ 30 వరకు నిర్బంధంలో ఉంచాలని ఆదేశించినట్లు కూడా పేర్కొంది.

ఈ ఘటనతో అమెరికాలోని హిందూ ఆలయాలు, మైనారిటీ వర్గాల భద్రతపై మరోసారి చర్చ మొదలైంది.