అమెరికా సైబర్ సెక్యూరిటీ విభాగంలో జరిగిన ఒక పొరపాటుకు “భారతీయుల ప్రవర్తనే” కారణమని ఒక MAGA మద్దతుదారు సోషల్ మీడియాలో విమర్శలు చేశారు. దీనిపై ఒక అమెరికన్ సాఫ్ట్‌వేర్ ఇంజనీర్ స్పందిస్తూ, తన పని ప్రదేశంలో భారతీయుల ప్రతిభను కొనియాడుతూ గట్టి సమాధానం ఇచ్చారు.
విమర్శ ఏమిటి? అమెరికా సైబర్ సెక్యూరిటీ సంస్థ (CISA) తాత్కాలిక అధిపతి మధు గొట్టుముక్కల, కొన్ని సున్నితమైన ప్రభుత్వ ఫైళ్లను ChatGPTలో అప్‌లోడ్ చేశారన్న వార్తపై ఒక X (ట్విట్టర్) వినియోగదారు స్పందించారు. “భారతీయులకు పని పట్ల సరైన అవగాహన ఉండదు, ప్రతి చిన్న విషయాన్ని ‘P1 అర్జంట్’ (అత్యంత అత్యవసరం) అంటూ గందరగోళం చేస్తారు” అని అతను ఆరోపించారు.
అమెరికన్ ఇంజనీర్ సమాధానం: ఈ విమర్శలపై జాన్ ఫ్రీమాన్ అనే అమెరికన్ ఇంజనీర్ స్పందిస్తూ.. “భారతీయుల నైపుణ్యం గురించి మాట్లాడుకుందాం. నా టీమ్ లీడ్, నా బాస్, మా CTO అందరూ భారతీయులే. వారు చాలా తెలివైన వారు, అందరితో స్నేహపూర్వకంగా ఉంటారు. నేను ఇక్కడ ఏడాదిగా పనిచేస్తున్నాను, ఏ రోజూ వారు అనవసరంగా కంగారు పడటం చూడలేదు. మీ కంపెనీలో అందరూ అసమర్థులే కనిపిస్తుంటే, బహుశా మీ కంపెనీ కేవలం అసమర్థులను మాత్రమే నియమించుకుంటుందేమో” అని ఎద్దేవా చేశారు.