భారతీయ సిమ్ కార్డులతో పాకిస్థాన్‌కు గూఢచర్యం. నౌకాదళ రహస్యాలను లీక్ చేసిన దేశద్రోహులు. ‘ఆపరేషన్ ఫైర్‌వాట్’ ద్వారా పట్టుబడిన ఏజెంట్లు. అసలేం జరిగింది?

ఆంధ్రప్రదేశ్‌లో భారత నౌకాదళ (నేవీ) రహస్యాలను పాకిస్థాన్‌కు లీక్ చేశారన్న గూఢచర్యం కేసుకు సంబంధించి మరో ఇద్దరిని పోలీసులు అరెస్టు చేశారు.

‘ఆపరేషన్ ఫైర్‌వాట్-2026’లో భాగంగా రెండవ దశ చర్యల్లో అక్టోబర్ 25న ఈ అరెస్టులు జరిగాయి. బీహార్‌కు చెందిన రాజా కుమార్, ఆదిత్య కుమార్‌లను అరెస్టు చేసి, బుధవారం విజయవాడ కోర్టులో హాజరుపరచగా.. వారికి నవంబర్ 10 వరకు కోర్టు రిమాండ్ విధించింది.

విచారణలో రాజా కుమార్ పీఓఎస్ (POS) ఏజెంట్‌గా పనిచేస్తున్నట్లు తేలింది. ఇతను నేపాల్‌లోని తన పరిచయాల ద్వారా భారతీయ మొబైల్ నంబర్లకు వచ్చే ఓటీపీ (OTP)లను పాకిస్థాన్ గూఢచారి ఏజెంట్లకు అందించేవాడు. ఈ ఓటీపీలను ఉపయోగించి వాట్సాప్ ఖాతాలను తెరిచి గూఢచర్యానికి వాడుకున్నారు. అంతేకాకుండా, ఈ పనులకు డబ్బు తీసుకోవడానికి వేరొకరి పేరుతో మొబైల్ పేమెంట్ బ్యాంక్ ఖాతాను తెరిచి, అందులో భారీగా నగదు పొందినట్లు విచారణలో బయటపడింది.

ఈ గూఢచర్య నెట్‌వర్క్‌లో ‘సోనీ’ లేదా ‘సోనీ క్వీన్’ పేరుతో పనిచేసిన పాకిస్థాన్ ఏజెంట్, విశాఖపట్నంలో నావల్ అధికారుల వద్ద కాంట్రాక్ట్ డ్రైవర్‌గా పనిచేస్తున్న అన్నం సాయి వరప్రసాద్‌ను సంప్రదించింది. అతని నుంచి తూర్పు నౌకాదళ కమాండ్ (ఈస్టర్న్ నేవల్ కమాండ్) పరిధిలోని యుద్ధనౌకలు, జలాంతర్గాములకు సంబంధించిన రహస్య సమాచారాన్ని సేకరించారు.

అలాగే, జోషితా పాల్ అనే మరో ఏజెంట్ విశాఖపట్నంలో పనిచేస్తున్న ఉద్యోగులకు డబ్బు పంపి రహస్య సమాచారాన్ని సేకరించేందుకు ప్రయత్నించింది. ఆదిత్య కుమార్ అనే వ్యక్తి రాజా కుమార్‌తో పాటు వసీమ్, సుల్తాన్, నయీమ్ వంటి పాకిస్థాన్ ఏజెంట్లతో కలిసి భారతీయ సిమ్ కార్డుల ఓటీపీల ద్వారా వాట్సాప్ ఖాతాలను నిర్వహించడానికి సహాయపడటమే కాకుండా, సీక్రెట్ మెసేజింగ్ యాప్‌ల ద్వారా కూడా వారితో టచ్‌లో ఉన్నాడు.

నౌకాదళం, రక్షణ స్థావరాలే లక్ష్యంగా సాగిన ఈ గూఢచర్య కార్యకలాపాలపై గత సెప్టెంబర్ 2వ తేదీనే వివిధ చట్టాల కింద కేసు నమోదు చేశారు. అంతకుముందు అన్నం సాయి వరప్రసాద్, నేవీ ఉద్యోగి ప్రదీప్ ముఖర్జీలను అరెస్టు చేసి విశాఖపట్నం జిల్లా జైలుకు తరలించారు. ప్రస్తుతం రాజా కుమార్, ఆదిత్య కుమార్‌ల అరెస్టుతో ఈ గూఢచర్య నెట్‌వర్క్‌కు సంబంధించిన దర్యాప్తు మరింత ముమ్మరమైంది.