వాషింగ్టన్: భారత్-అమెరికా మధ్య వాణిజ్య ఒప్పందం (India-US trade deal) గత కొన్ని నెలలుగా ‘ఇప్పుడే పూర్తవుతుంది.. అప్పుడే పూర్తవుతుంది’ అని వినిపిస్తున్నప్పటికీ, కొన్ని కారణాల వల్ల అది ఇంకా కార్యరూపం దాల్చలేదు.
అయితే, ఈ ఒప్పందం కుదరకపోవడానికి అసలు కారణం ఏంటి? ఎక్కడ చిక్కులు వచ్చాయి? అనే విషయాలపై తాజాగా కొన్ని సంచలన నిజాలు వెలుగులోకి వచ్చాయి. భారత్-అమెరికా మధ్య గత కొన్నేళ్లుగా మంచి సంబంధాలు ఉన్నాయి. కానీ ట్రంప్ బాధ్యతలు చేపట్టిన ఈ ఏడాది కాలంలో ఇవి తీవ్రంగా ప్రభావితమయ్యాయి. భారత్‌పై ట్రంప్ 50% టారిఫ్ (పన్ను) విధించడంతో ఇరు దేశాల మధ్య వాణిజ్యం దెబ్బతింది. అయినప్పటికీ, త్వరలోనే వాణిజ్య ఒప్పందం కుదురుతుందని భావించారు.
తీవ్ర జాప్యం.. బయటపడ్డ ఆడియో
వివిధ కారణాల వల్ల ఈ డీల్ సాగుతూ వస్తోంది. ఈ క్రమంలో ట్రంప్ సొంత పార్టీకి (రిపబ్లికన్) చెందిన టెడ్ క్రూజ్ మాట్లాడిన ఒక ఆడియో క్లిప్ ఇప్పుడు బయటపడి కలకలం రేపుతోంది. ట్రంప్ పరిపాలన విభాగంలో (Administration) భారీ చీలిక ఉందని క్రూజ్ విమర్శించారు. ఆ ఆడియోలో ఆయన వైస్ ప్రెసిడెంట్ జే.డీ. వెన్స్ మరియు ప్రెసిడెంట్ ట్రంప్‌పై తీవ్ర విమర్శలు చేశారు. ట్రంప్ అనుసరిస్తున్న టారిఫ్ రాజకీయాలను ఆయన ఎండగట్టారు.
భారత్-అమెరికా వాణిజ్య ఒప్పందాన్ని అడ్డుకుంది వైస్ ప్రెసిడెంట్ వెన్స్ మరియు వైట్ హౌస్ సలహాదారు పీటర్ నవారో అని ఆయన ఆరోపించారు. కొన్ని సందర్భాల్లో స్వయంగా ట్రంప్ కూడా ఈ ఒప్పందం ఆగిపోవడానికి కారణమయ్యారని ఆయన విమర్శించారు.
వివాదాస్పద ఆడియో నేపథ్యం
ఇది 2025 మధ్యలో జరిగిన ఒక విరాళాల సేకరణ (Fundraising) కార్యక్రమంలో క్రూజ్ మాట్లాడిన ఆడియో. సుమారు 10 నిమిషాల నిడివి గల ఈ ఆడియోను రిపబ్లికన్ వర్గాలే బయటపెట్టినట్లు తెలుస్తోంది. ఈ సంభాషణలో క్రూజ్ తనను తాను స్వేచ్ఛా వాణిజ్య మద్దతుదారుడిగా చిత్రించుకున్నారు. 2028 అధ్యక్ష ఎన్నికల్లో తనను తాను ఒక బలమైన అభ్యర్థిగా ప్రొజెక్ట్ చేసుకునే ప్రయత్నం చేసినట్లు కనిపిస్తోంది.
అధ్యక్షుడు ట్రంప్ వాణిజ్య విధానాలను ఎగతాళి చేస్తూ.. ఈ పన్నుల వల్ల అమెరికా ఆర్థిక వ్యవస్థ దెబ్బతిందని క్రూజ్ పేర్కొన్నారు. దీనివల్ల అధ్యక్షుడిపై మళ్లీ అభిశంసన తీర్మానం (Impeachment) వచ్చే అవకాశం ఉందని కూడా ఆయన వ్యాఖ్యానించారు. 2025 ఏప్రిల్‌లో ట్రంప్ పన్నులను ప్రకటించినప్పుడు, తాను మరియు మరికొందరు ఎంపీలు కలిసి ఆ నిర్ణయాన్ని వెనక్కి తీసుకోవాలని అధ్యక్షుడిని కోరినట్లు ఆయన తెలిపారు.
పన్నుల వివాదం.. అర్ధరాత్రి ఫోన్ కాల్
ఆ ఫోన్ కాల్ అర్ధరాత్రి దాటినా కొనసాగిందని, అయినప్పటికీ ట్రంప్‌ను తాము ఒప్పించలేకపోయామని క్రూజ్ చెప్పారు. ఆ సమయంలో ట్రంప్ చాలా కోపంగా ఉన్నారని, తమపై అరిచి తిట్టారని ఆయన వెల్లడించారు. ఈ పన్నుల వల్ల వస్తువుల ధరలు పెరుగుతాయని, ఇది 2026 మిడ్-టర్మ్ ఎన్నికల్లో ఓటమికి దారితీస్తుందని తాను హెచ్చరించినట్లు క్రూజ్ ఆ ఆడియోలో పేర్కొన్నారు.
భారత్‌తో వాణిజ్య ఒప్పందాన్ని అంగీకరించాలని వైట్ హౌస్‌పై అనేక వర్గాల నుంచి ఒత్తిడి వచ్చినట్లు క్రూజ్ దాతలకు వివరించారు. ఇంత ఒత్తిడి ఉన్నా డీల్ ఎందుకు ఓకే అవ్వడం లేదని ఒకరు ప్రశ్నించగా.. వైట్ హౌస్ ఆర్థిక సలహాదారు పీటర్ నవారో, జే.డీ. వెన్స్ మరియు కొన్నిసార్లు ట్రంప్ అనాలోచిత నిర్ణయాలే దీనికి కారణమని క్రూజ్ సమాధానమిచ్చారు.