న్యూఢిల్లీ: 2026 నాటికి ప్రపంచ జీడీపీ వృద్ధిలో భారత్ రెండో స్థానంలో నిలుస్తుందన్న గ్లోబల్ స్టాటిస్టిక్స్ నివేదికపై టెస్లా సీఈఓ ఎలాన్ మస్క్ స్పందించారు. మస్క్ చేసిన వ్యాఖ్యలను ఉటంకిస్తూ కేంద్ర పార్లమెంటరీ వ్యవహారాల మంత్రి కిరణ్ రిజిజు.. లోక్‌సభ ప్రతిపక్ష నేత రాహుల్ గాంధీపై విమర్శలు గుప్పించారు. ప్రభుత్వాన్ని విమర్శించే క్రమంలో భారత్‌ను తక్కువ చేసి మాట్లాడవద్దని ఆయన సూచించారు.
మస్క్ ఏమన్నారు?: “ప్రపంచ దేశాల మధ్య శక్తి సమతుల్యత (Balance of Power) మారుతోంది” అని మస్క్ పేర్కొన్నారు. చైనా మరియు భారతదేశం కలిసి ప్రపంచ ఆర్థిక వృద్ధిలో 43.6% వాటాను కలిగి ఉంటాయన్న గణాంకాలను ఆయన పంచుకున్నారు.
కిరణ్ రిజిజు కౌంటర్: కేంద్ర బడ్జెట్ 2026-27ను రాహుల్ గాంధీ విమర్శిస్తున్న నేపథ్యంలో రిజిజు స్పందించారు. “ప్రభుత్వాన్ని విమర్శించడం మీ ప్రజాస్వామ్య హక్కు, కానీ దేశాన్ని తక్కువ చేయకండి. భారత విజయాలను ఎప్పుడూ తక్కువ చేసి చూపవద్దు. గర్వించదగ్గ భారతీయుడిగా ఉండండి” అని రిజిజు ఎక్స్ (X) వేదికగా రాహుల్ గాంధీకి హితవు పలికారు.
నిర్మలా సీతారామన్ స్పందన: బడ్జెట్ 2026 యువజన సదస్సులో ఆర్థిక మంత్రి నిర్మలా సీతారామన్ మాట్లాడుతూ.. “IMF డేటాను చూసి ఎలాన్ మస్క్ ఆశ్చర్యపోయారు. ప్రపంచ జీడీపీ వృద్ధిలో చైనా వాటా 26% ఉంటే, భారత్ వాటా 17%గా ఉంది. ఈ రెండు దేశాల నుండే 43% వృద్ధి వస్తోంది. భారత్ ఇప్పుడు ఎంతటి ఆర్థిక శక్తిగా ఎదిగిందో ప్రతిపక్షాలు అర్థం చేసుకోవాలి” అని అన్నారు.
ఆర్థిక వ్యవస్థపై రాహుల్ గాంధీ విమర్శలు: మరోవైపు రాహుల్ గాంధీ బడ్జెట్‌పై తన అసంతృప్తిని వ్యక్తం చేశారు. నిరుద్యోగం, తయారీ రంగం పతనం, పెట్టుబడుల ఉపసంహరణ, రైతుల ఇబ్బందులు వంటి కీలక అంశాలను ప్రభుత్వం విస్మరించిందని ఆయన ఆరోపించారు. దేశం ఎదుర్కొంటున్న వాస్తవ సంక్షోభాల పట్ల ఈ బడ్జెట్ గుడ్డిగా ఉందని విమర్శించారు.