అమెరికాలో దిగుమతి సుంకాలపై నెలకొన్న తీవ్ర అనిశ్చితి భారత దేశపు పెద్ద ఎగుమతిదారులను ఆందోళనలో పడేసింది. ముఖ్యంగా టెక్స్‌టైల్ (దుస్తులు), జెమ్స్ అండ్ జ్యువెలరీ (రత్నాలు, ఆభరణాలు), మరియు సీఫుడ్ రంగాలకు చెందిన వ్యాపారులు ఇప్పుడు పెద్ద సంక్షోభాన్ని ఎదుర్కొంటున్నారు.
పరిస్థితి ఎంత తీవ్రంగా ఉందంటే, అమెరికాకు వెళ్లాల్సిన చాలా షిప్‌మెంట్లను సరఫరాదారులు మధ్యలోనే నిలిపివేశారు. వాణిజ్య నియమాలు మరియు డ్యూటీ స్ట్రక్చర్‌పై స్పష్టత వచ్చే వరకు భారత ఎగుమతిదారులు ఆచి తూచి అడుగులు వేస్తున్నారు.
కోర్టు తీర్పుతో మారిన ఆట: అమెరికా సుప్రీం కోర్టు ‘ఇంటర్నేషనల్ ఎమర్జెన్సీ ఎకనామిక్ పవర్స్ యాక్ట్’ (IEEPA) కింద విధించిన టారిఫ్‌లను కొట్టివేసింది. అయితే, ఈ తీర్పు వచ్చిన కొద్ది గంటల్లోనే అధ్యక్షుడు డొనాల్డ్ ట్రంప్ ‘ట్రేడ్ యాక్ట్ 1974’లోని సెక్షన్ 122 కింద కొత్త గ్లోబల్ టారిఫ్‌ను అమలు చేశారు. మొదట ఈ సుంకం 10 శాతంగా ఉంటుందని భావించినప్పటికీ, మరుసటి రోజే దానిని 15 శాతానికి పెంచారు.
రొయ్యలు, ఆభరణాల పరిశ్రమపై ముంచుకొస్తున్న గండం: సీఫుడ్ ఎగుమతిదారుల సంఘం జాతీయ అధ్యక్షుడు గుంటూరు పవన్ కుమార్ తెలిపిన వివరాల ప్రకారం.. అమెరికా కొనుగోలుదారుల సూచన మేరకు రొయ్యల ఎగుమతిదారులు ప్రస్తుతం షిప్‌మెంట్లను నిలిపివేశారు. అమెరికాకు భారత్ చేసే అతిపెద్ద వ్యవసాయ ఎగుమతి రొయ్యలే (గత ఏడాది 2.4 బిలియన్ డాలర్లు). అలాగే, దాదాపు 10 బిలియన్ డాలర్ల ఎగుమతులు చేసే ఆభరణాల రంగం కూడా కనీసం వారం రోజుల పాటు సరఫరాను ఆపేసింది.
టెక్స్‌టైల్ రంగంలో లాభాల కాలం ముగిసినట్లేనా? కొత్త టారిఫ్ రేట్ల వల్ల అమెరికాతో కుదిరిన వాణిజ్య ఒప్పందం ద్వారా భారత్‌కు లభించిన పోటీతత్వ ప్రయోజనం (Competitive advantage) దాదాపు తుడిచిపెట్టుకుపోయిందని నిపుణులు భావిస్తున్నారు. అనిశ్చితి మధ్య వ్యాపారం చేయడం అసాధ్యమని క్లాత్ మ్యానుఫ్యాక్చరర్స్ అసోసియేషన్ ప్రతినిధులు పేర్కొంటున్నారు.