భారతదేశం చూసిన అత్యంత ప్రమాదకరమైన నేరస్థులలో ఒకడు అండర్ వరల్డ్ డాన్ దావూద్ ఇబ్రహీం. అల్-ఖైదాతో సంబంధాల నేపథ్యంలో అమెరికా మరియు ఐక్యరాజ్యసమితి భద్రతా మండలి అతడిని అంతర్జాతీయ ఉగ్రవాదిగా ప్రకటించాయి. అయితే, ఇంతటి శక్తివంతుడైన దావూద్ సామ్రాజ్యాన్ని గడగడలాడించిన ఒక మహిళ ఉంది, ఆమె పేరే అష్రఫ్ ఖాన్ అలియాస్ ‘సప్నా దీదీ’.
ముంబైలోని పురుషాధిక్య అండర్ వరల్డ్ ప్రపంచంలో సవాలు విసిరిన మహిళ అష్రఫ్ ఖాన్. తన భర్తను చంపమని దావూద్ ఆదేశించినప్పుడు, ఆ డాన్ ప్రతీకారం తీర్చుకుంటానని మాటిచ్చింది. ఆమె డి-కంపెనీ కార్యకలాపాలను అడ్డుకుంది మరియు దావూద్ హత్యకు పథకం వేసింది. 1994లో ఆమె దారుణంగా హత్యకు గురయ్యే ముందు వరకు ప్రతీకారానికి ఒక చిహ్నంగా నిలిచింది.
ముంబైలో ఒక సాధారణ గృహిణిగా ఉన్న అష్రఫ్ ఖాన్ జీవితం ఒక్కసారిగా తలకిందులైంది. తన భర్త మెహమూద్ ఖాన్‌కు దావూద్‌తో సంబంధం ఉందనే విషయం ఆమెకు తర్వాత తెలిసింది. దావూద్ ఆదేశాలను పాటించలేదనే నెపంతో, ముంబై విమానాశ్రయంలో పట్టాపగలే అతడిని చంపేశారు. ఈ ఘటన అష్రఫ్‌ను ‘సప్నా దీదీ’గా మార్చింది. తన భర్త మరణానికి ప్రతీకారం తీర్చుకుంటానని శపథం చేసిన ఆమె, తుపాకీ వాడటం, మోటార్ సైకిల్ నడపడం నేర్చుకుంది. అండర్ వరల్డ్ గుట్టుమట్లు తెలుసుకుంది. జీన్స్, జాకెట్ ధరిస్తూ తన వేషధారణను మార్చుకుంది. ఆమె లక్ష్యం అధికారం కాదు, కేవలం ప్రతీకారం.
దావూద్ శత్రువైన హుస్సేన్ ఉస్తారా సాయంతో ఆమె అండర్ వరల్డ్ కార్యకలాపాలు మొదలుపెట్టింది. దావూద్ ఆయుధాల రవాణాను అడ్డుకోవడం, జూద కేంద్రాలను దెబ్బతీయడం వంటి పనులు చేసింది. షార్జాలో జరిగిన భారత్-పాకిస్థాన్ క్రికెట్ మ్యాచ్ సందర్భంగా దావూద్‌ను చంపడానికి ఆమె భారీ స్కెచ్ వేసింది. దావూద్ విఐపి గ్యాలరీలో మ్యాచ్ చూస్తున్నాడని తెలుసుకుని, అక్కడే అతడిని అంతం చేయాలనుకుంది. కానీ ఆ ప్లాన్ ముందే లీక్ కావడంతో దావూద్ తప్పించుకున్నాడు.
దీనిని మనసులో ఉంచుకున్న దావూద్, 1994లో తన మనుషులను ఆమె ఇంటికి పంపి దారుణంగా దాడి చేయించాడు. 22 సార్లు కత్తితో పొడవడంతో సప్నా దీదీ ప్రాణాలు కోల్పోయింది.