ఉత్తరప్రదేశ్ రాజధాని లక్నో నుండి ఒక సంచలన ఘటన వెలుగులోకి వచ్చింది. ఇంట్లో కూడా ప్రజలు సురక్షితంగా లేని పరిస్థితి నెలకొంది. మీరు ఇంట్లో ఉన్నప్పుడు ఎవరో ఒకరు మీపై నిఘా పెడుతున్నారని ఊహించడం కూడా భయానకంగా ఉంది. మీ ఇంటి గోడలో లేదా సీలింగ్లో ఒక చిన్న రంధ్రం మీ పరువును క్షణాల్లో తీసేయగలదు. ప్రస్తుతం ఒక దంపతులు ఇదే సమస్యతో పోలీసు స్టేషన్ చుట్టూ తిరుగుతున్నారు. ఆ పూర్తి వివరాలు ఇవే…
రూ. 6 కోట్ల కోసం బెదిరింపులు: ఒక దంపతుల మొబైల్ ఫోన్కు వచ్చిన మెసేజ్ వారి నిద్రను దూరం చేసింది. రాత్రి 11 గంటల సమయంలో తెలియని నంబర్ నుండి మెసేజ్ వచ్చింది. ఆ మెసేజ్ ఓపెన్ చేసి చూసిన దంపతులు ఒక్కసారిగా షాక్కు గురయ్యారు. అందులో వారిద్దరూ బాత్రూమ్లో ఉన్న వీడియోను పంపి, ఆ వీడియోను బయటపెట్టకుండా ఉండాలంటే రూ. 6 కోట్లు ఇవ్వాలని డిమాండ్ చేశారు.
ఫాల్స్ సీలింగ్లో రంధ్రం: వీడియోను చూసిన వెంటనే భయాందోళనకు గురైన దంపతులు బాత్రూమ్ను తనిఖీ చేశారు. ఆశ్చర్యకరంగా, బాత్రూమ్ ఫాల్స్ సీలింగ్లో ఒక చిన్న రంధ్రం కనిపించింది. ఎవరో దుండగులు రహస్యంగా కెమెరాను అమర్చి, వారి ప్రైవేట్ వీడియోను చిత్రీకరించినట్లు గుర్తించారు. ఆ దుండగుడు పదేపదే ఫోన్ చేస్తూ, డబ్బులు ఇవ్వకపోతే వీడియోను సోషల్ మీడియాలో వైరల్ చేసి వారి జీవితాన్ని నాశనం చేస్తానని బెదిరిస్తున్నాడు.
పోలీసుల విచారణ: బాధిత దంపతులు వెంటనే పోలీసులను ఆశ్రయించి జరిగిన విషయాన్ని వివరించారు. రహస్య కెమెరా ద్వారా తమ వీడియోను చిత్రీకరించి, డబ్బుల కోసం వేధిస్తున్నట్లు ఫిర్యాదు చేశారు. ఈ ఫిర్యాదు మేరకు పోలీసులు ఎఫ్ఐఆర్ (FIR) నమోదు చేసి విచారణ ప్రారంభించారు. అయితే, ఆ దుండగుడు ఎవరో ఇప్పటివరకు తెలియరాలేదు. పోలీసులు గాలింపు చర్యలు చేపట్టారు. నాలుగు గోడల మధ్య ఉండాల్సిన వారి ప్రైవసీని దెబ్బతీస్తూ జరిగిన ఈ ఘటన స్థానికంగా తీవ్ర చర్చనీయాంశమైంది.