భార్య వివాహేతర సంబంధాన్ని వ్యతిరేకించిన భర్త.. చివరకు ఇటుకలతో కొట్టి చంపిన దారుణం..! కాలువ సమీపంలో మృతదేహం లభ్యం..!!!

ఉత్తరప్రదేశ్ రాష్ట్రం ప్రతాప్‌గఢ్ జిల్లాలో, 45 ఏళ్ల ఉమాశంకర్ అలియాస్ గుట్టు హత్యకు గురైన ఘటన తీవ్ర దిగ్భ్రాంతిని కలిగించింది.

పాత్రలు (గిన్నెలు) విక్రయించే వ్యాపారం చేసే ఆయన, బుధవారం రాత్రి ఇంటి నుంచి ద్విచక్ర వాహనంపై బయటకు వెళ్లాడు. కానీ, ఎంత రాత్రయినా ఇంటికి తిరిగి రాలేదు. దీంతో కుటుంబ సభ్యులు అతని కోసం వెతకగా, గురువారం ఉదయం శీతల్‌మౌ ప్రాంతంలోని ఓ కాలువ సమీపంలో ఉన్న గుంతలో అతడి మృతదేహం లభ్యమైంది.

ఉమాశంకర్ తల, ఛాతి భాగాలపై ఇటుకలతో దాడి చేసిన గాయాలు ఉన్నట్లు పోలీసులు తెలిపారు. దీంతో అతడిని హత్య చేసి ఉంటారనే కోణంలో దర్యాప్తు ప్రారంభించారు. ఘటనా స్థలానికి చేరుకున్న ఫోరెన్సిక్ బృందం అక్కడి ఆధారాలను సేకరించింది. రాత్రి ఇంటి నుంచి బయటకు వెళ్లిన వ్యక్తి మరుసటి రోజు ఉదయానికి శవమై కనిపించిన ఘటన స్థానికులను తీవ్ర భయాందోళనలకు గురిచేసింది.

ఉమాశంకర్ భార్య సుమన్ దేవి, ఆమెతో వివాహేతర సంబంధం కలిగి ఉన్నాడని ఆరోపణలు ఎదుర్కొంటున్న షహన్‌షాలపై ఉమాశంకర్ సోదరుడు ఇచ్చిన ఫిర్యాదు మేరకు పోలీసులు హత్య కేసు నమోదు చేశారు. భార్య వివాహేతర సంబంధాన్ని ఉమాశంకర్ తీవ్రంగా వ్యతిరేకించాడని, ఈ విషయమై గతంలోనే వారి మధ్య గొడవలు కూడా జరిగాయని పోలీసులు తెలిపారు. అయితే, ఆరోపణలకు సంబంధించిన పూర్తి వివరాలు దర్యాప్తులో నిర్ధారించాల్సి ఉందని పేర్కొన్నారు.

ఈ వ్యవహారానికి సంబంధించి గతంలో కూడా సుమన్ దేవి, షహన్‌షా మరియు గుర్తుతెలియని మరో వ్యక్తిపై దాడికి పాల్పడినట్లు ఓ ఫిర్యాదు నమోదైందని పోలీసు వర్గాలు తెలిపాయి. ప్రస్తుతం ఉమాశంకర్ మృతదేహాన్ని పోస్టుమార్టం నిమిత్తం ఆసుపత్రికి తరలించారు. ఫిర్యాదులో పేర్కొన్న నిందితుల కోసం గాలింపు చర్యలు చేపట్టారు. కుటుంబ కలహాలే ఈ హత్యకు దారితీశాయా, అసలు ఆ రోజు ఏం జరిగిందనే విషయాలను తెలుసుకునేందుకు పోలీసులు లోతుగా దర్యాప్తు చేస్తున్నారు.