రాజస్థాన్ అనగానే రాజభవనాలు, కోటలు వంటి ఎన్నో చారిత్రక ప్రదేశాలు గుర్తుకొస్తాయి. ఆ కోవలో, ఉదయ్‌పూర్‌లోని లేక్ ప్యాలెస్ (Lake Palace) విశిష్టమైన అందాన్ని కలిగి ఉంది.
జగ్ నివాస్ అని కూడా పిలువబడే ఈ ప్యాలెస్, పిచోలా సరస్సు మధ్యలో ఉన్న ఒక ద్వీపంలో ఉంది. తెల్లటి పాలరాయితో నిర్మించిన ఈ భవనం సరస్సు మధ్యలో గంభీరంగా కనిపిస్తుంది. దీని మరో ప్రత్యేకత ఏమిటంటే, ఇక్కడికి కేవలం పడవ ద్వారా మాత్రమే చేరుకోగలం.
ఈ రాజభవనాన్ని 1743 మరియు 1746 సంవత్సరాల మధ్య, మేవార్ రాజు మహారాణా జగత్ సింగ్ II తన కుటుంబం కోసం వేసవి విడిదిగా నిర్మించాడు. ఆ తర్వాత దీనిని లగ్జరీ హోటల్‌గా మార్చారు. ప్రస్తుతం ఇది ‘తాజ్ లేక్ ప్యాలెస్’ పేరుతో ఒక ప్రసిద్ధ లగ్జరీ హోటల్‌గా నడుస్తోంది. ఇక్కడ బస చేసే అతిథులు రోడ్డు మార్గంలో వెళ్లలేరు. పడవలో ప్రయాణించి మాత్రమే ఈ ప్యాలెస్ చేరుకోగలరు. ఈ ప్రయాణమే పర్యాటకులకు ఒక ప్రత్యేకమైన అనుభూతిని ఇస్తుంది.
పిచోలా సరస్సులో పడవలో వెళుతున్నప్పుడు, ఆరావళి పర్వత శ్రేణి మరియు ఉదయ్‌పూర్ పురాతన భవనాలు ఎంతో అందంగా కనిపిస్తాయి. పడవ ముందుకు వెళుతుండగా సరస్సు మధ్యలో ఉన్న లేక్ ప్యాలెస్ మెల్లగా కనిపించడం కనువిందు చేస్తుంది. నలుపు, తెలుపు పాలరాతి మిశ్రమంతో ఉన్న ఈ రాజభవనంలో అందమైన ప్రాంగాణాలు, ఫౌంటైన్లు (నీటి బుగ్గలు), తోటలు, స్తంభాలతో కూడిన నడకమార్గాలు మరియు అరుదైన రాళ్లతో చేసిన అలంకరణ పనులు ఉన్నాయి. సరస్సులో ఉన్న మరో ప్రసిద్ధ ప్యాలెస్ ‘జగ్ మందిర్’. ఇకపోతే, సరస్సు తూర్పు ఒడ్డున ‘సిటీ ప్యాలెస్’ ఉంది.
ఉదయ్‌పూర్ నగరపు ప్రధాన ఆకర్షణలలో పిచోలా సరస్సు ఒకటి. 14వ శతాబ్దంలో ఏర్పడిన ఈ సరస్సు, తరువాత రెండవ మహారాణా ఉదయ్ సింగ్ చేత విస్తరించబడింది. 1553లో ఉదయ్‌పూర్ నగరాన్ని కూడా ఆయనే స్థాపించారు. ముఖ్యంగా, సూర్యాస్తమయం సమయంలో సరస్సులో పడవ ప్రయాణం చేయడం పర్యాటకులలో బాగా ప్రాచుర్యం పొందింది. ఆ సమయంలో ప్యాలెస్‌లు, పర్వతాల నీడలు సరస్సు నీటిలో ప్రతిఫలించి ఒక అందమైన దృశ్యాన్ని సృష్టిస్తాయి. ఉదయ్‌పూర్ వెళ్లాలని ప్లాన్ చేసుకునే వారు, కేవలం ఒడ్డు నుండి ప్యాలెస్‌ని చూడటంతోనే సరిపెట్టుకోకుండా.. పడవ ప్రయాణం ద్వారా కూడా దాని అందాన్ని ఆస్వాదించవచ్చు.
Leave a Reply