అమెరికా: మద్యపానం మరియు మాదకద్రవ్యాలకు బానిసవ్వడం ఒక కుటుంబాన్ని నాశనం చేయడమే కాకుండా, మనిషి చివరి రోజులను ఎలా నరకప్రాయంగా మారుస్తుందో వివరించే ఒక హృదయవిదారక ఉదంతాన్ని అమెరికాలోని వాషింగ్టన్కు చెందిన ఒక యువతి తన యూట్యూబ్ ఛానల్ ‘DaughterofChrist1011’ ద్వారా పంచుకుంది.
మోడలింగ్ రంగంలో ఉన్న ఆమె తండ్రి, మద్యపానానికి బానిస కావడంతో చివరి రోజుల్లో దారుణమైన పరిస్థితిని ఎదుర్కొన్నారు. అధిక మద్యపానం వల్ల ‘లివర్ సిర్రోసిస్’ (Liver Cirrhosis) వ్యాధి బారిన పడి ఆయన ఆసుపత్రిలో చేరారు. అక్కడ మందులు వేసుకోవడానికి నిరాకరించిన ఆయనను, చనిపోవడానికి కొన్ని వారాల ముందు అతని కుమార్తె పరామర్శించింది. అప్పుడు పడకపై ఉన్న తండ్రి, భయంతో కేకలు వేస్తూ.. ఆ గది నుంచి వెళ్లిపోవాలని కూతురిని వేడుకున్నాడు. గది గోడలు నిప్పు అంటుకుని మండుతున్నాయని, పెద్ద పళ్లతో వింత జంతువులు తన వైపు వస్తున్నాయని, కుళ్లిన వాసన వస్తోందని ఆయన ఆవేదన చెందారు.
మద్యపానాన్ని ఒక్కసారిగా మానేయడం వల్ల కలిగే భ్రమలు (Hallucinations) అని నర్సులు చెప్పినప్పటికీ, తన తండ్రి నరకాన్ని కళ్లారా చూశాడని ఆ కుమార్తె బలంగా నమ్ముతోంది. అనంతరం ఆయన్ని ఐసియు (ICU)కు తరలించారు. మరణానికి చివరి క్షణాల్లో అక్కడ ఒక అద్భుతం జరిగింది; ఆయన ఏడుస్తూనే యేసును అంగీకరించారు, ఆయన సోదరుడైన ఫాదర్ ఆయన కోసం ప్రార్థనలు చేశారు.
ప్రార్థన ముగిసిన తర్వాత ఆ గది మొత్తం ప్రశాంతంగా మారింది. ఆయన చనిపోవడానికి సరిగ్గా 5 నిమిషాల ముందు కళ్లు తెరిచి, తన పడక పక్కన ఒక అందమైన ప్రకాశవంతమైన వెలుగును, ఇప్పటికే మరణించిన తన తల్లిని చూశానని చెప్పి, చాలా ప్రశాంతంగా కన్నుమూశారు. ఈ సంఘటన తన జీవితాన్ని పూర్తిగా మార్చేసిందని ఆ యువతి పేర్కొంది.