మనుషులనే తినే భయంకరమైన పిరాన్హాలు..! ఒక మాంసం ముక్కతో గుంపులు గుంపులుగా పట్టుకున్న మత్స్యకారుడు.

అమెజాన్ అడవులు మరియు దక్షిణ అమెరికా ప్రాంతాల్లో కనిపించే, మాంసాహార ‘పిరాన్హా’ (Piranha) చేపలను కేవలం ఒక మాంసం ముక్కతో ఒక మత్స్యకారుడు వేటాడే వీడియో ఇప్పుడు ఇంటర్నెట్‌లో వైరల్ అవుతోంది.

సాధారణంగా చేపలను వలలు లేదా గాలం ఉపయోగించి పడతారు. కానీ, ఎక్స్ (ట్విట్టర్) వేదికగా @TansuYegen అనే వ్యక్తి పంచుకున్న ఈ 40 సెకన్ల వీడియోలో, ఒక మత్స్యకారుడు చాలా భయంకరమైన పద్ధతిని అనుసరించాడు. అతను ఒక పెద్ద మాంసం ముక్కను నీటి అంచున ఉంచగానే, ఆకలితో ఉన్న వందలాది పిరాన్హా చేపలు దానిని కొరకడానికి పైకి వచ్చాయి. అవి ఆ మాంసాన్ని పట్టుకున్న వెంటనే, ఆ మత్స్యకారుడు నేరుగా ఒక గంపలోకి వాటిని విదిలించి పట్టేసుకున్నాడు.

ఈ వీడియోను ఇప్పటివరకు లక్షకు పైగా నెటిజన్లు వీక్షించారు. “ఒకవేళ ఎవరైనా పొరపాటున ఆ నీటిలో పడితే వారి పరిస్థితి ఏంటి?” అని కొందరు భయంతో కామెంట్ చేయగా, మరికొందరు స్థానిక ప్రజల వేట నైపుణ్యాన్ని చూసి ఆశ్చర్యపోతున్నారు.