టెహ్రాన్: “ఈ రాత్రికి ఇరాన్ అనే దేశమే ఉండదు.. ప్రజలందరూ హతమవుతారు” అని అమెరికా అధ్యక్షుడు డొనాల్డ్ ట్రంప్ తీవ్రస్థాయిలో హెచ్చరించారు. ఈ నేపథ్యంలోనే ట్రంప్‌కు వ్యతిరేకంగా ఇరాన్ తన వద్ద రెండు ప్రధాన వ్యూహాలు ఉన్నట్లు ప్రకటించింది. ఈ ప్లాన్‌లు అమలులోకి వస్తే సౌదీ అరేబియా, ఖతార్‌లతో సహా మొత్తం మధ్యప్రాచ్యం స్తంభించిపోవడమే కాకుండా, ఐరోపా దేశాలు కూడా భారీ నష్టాన్ని ఎదుర్కోవాల్సి వస్తుంది.
ప్రస్తుతం ఇరాన్ రైల్వే వంతెనలు, రోడ్డు మౌలిక సదుపాయాలపై ఇజ్రాయెల్, అమెరికా దాడులు చేస్తున్నాయి. హార్ముజ్ జలసంధిని ఈ రాత్రి 8 గంటల లోపు తెరవకపోతే ఇరాన్‌ను నామరూపాలు లేకుండా చేస్తామని ట్రంప్ ఇచ్చిన గడువు ఇరాన్ ప్రజలను భయాందోళనలకు గురిచేస్తోంది.
ఇరాన్ సిద్ధం చేసిన 2 ప్లాన్‌లు:
మొదటి ప్లాన్: “కేవలం డొల్ల వాగ్దానాల కోసం మేము హార్ముజ్ జలసంధిని తెరవము. మా దేశంలోని విద్యుత్ కేంద్రాలపై అమెరికా దాడి చేస్తే, మేము కూడా అదే స్థాయిలో సమాధానం ఇస్తాము. ఈ ప్రాంతంలో అమెరికాకు మిత్రదేశాలైన ఖతార్, సౌదీ అరేబియాలోని విద్యుత్ కేంద్రాలపై మేము దాడులు చేస్తాము. దీనివల్ల మొత్తం మధ్యప్రాచ్యం చీకటిలో మునిగిపోతుంది. అంతేకాకుండా, అమెరికా పరిధులు దాటితే ఇరాన్ మిత్రదేశాలు (హౌతీలు వంటివి) ప్రధాన సముద్ర మార్గాలను దిగ్బంధిస్తాయి.” అని ఇరాన్ అధికారులు హెచ్చరించారు.
రెండవ ప్లాన్: ఇప్పటికే ఇరాన్ హార్ముజ్ జలసంధిని మూసివేసింది. దీనికి తదుపరి దశగా ‘బాబ్ ఎల్-మండేబ్’ (Bab al-Mandab Strait) జలసంధిని మూసివేయాలని ఇరాన్ యోచిస్తోంది. ఇది జరిగితే ప్రపంచ దేశాలన్నీ అతలాకుతలం అవుతాయి. ఎందుకంటే ఈ జలసంధి ఎర్ర సముద్రాన్ని (Red Sea) అరబిక్ సముద్రంతో అనుసంధానించే అత్యంత కీలక మార్గం. ఇక్కడ ఇరాన్ మద్దతు ఉన్న హౌతీ రెబల్స్ ఇప్పటికే అమెరికా, ఇజ్రాయెల్ నౌకలపై దాడులు చేస్తున్నారు. ఒకవేళ ఇరాన్ ఆదేశంతో ఈ మార్గం పూర్తిగా మూతబడితే, ప్రపంచ వాణిజ్యం కుప్పకూలుతుంది.
దీనివల్ల కలిగే నష్టాలు:
- ఈ మార్గం మూతపడితే ఈజిప్ట్ లోని సూయజ్ కాల్వ ద్వారా జరిగే నౌకాయానం పూర్తిగా నిలిచిపోతుంది.
- గల్ఫ్ దేశాల నుండి ఐరోపా, ఉత్తర అమెరికాకు వెళ్లే ముడి చమురు, సహజ వాయువు (LNG) సరఫరా ఆగిపోతుంది.
- ప్రపంచవ్యాప్తంగా పెట్రోల్, డీజిల్ ధరలు విపరీతంగా పెరుగుతాయి.
- నౌకలు ఆఫ్రికాను చుట్టుకుని వెళ్లాల్సి రావడం వల్ల ప్రయాణ సమయం 10 నుండి 14 రోజులు పెరుగుతుంది, దీనివల్ల వస్తువుల ధరలు ఆకాశాన్ని తాకుతాయి. ప్రపంచ వాణిజ్యంలో 12% ఈ మార్గం ద్వారానే జరుగుతుంది.