చనిపోయిన వ్యక్తి మళ్ళీ బతికి వస్తే ఎలా ఉంటుందో ఊహించుకోండి.. వినడానికి ఇది అద్భుతంగా అనిపించినా, కళ్లముందు జరిగితే మాత్రం చాలా భయంకరంగా ఉంటుంది. సరిగ్గా ఇలాంటి ఘటనే సుమారు 100 ఏళ్ల క్రితం అమెరికాలో జరిగింది.
ఒక మహిళ చనిపోయిందని వైద్యులు ప్రకటించారు. అంత్యక్రియలు ముగిసి ఆమెను సమాధి కూడా చేశారు. కానీ ఆమె సోదరి ఆలస్యంగా వచ్చి, తన సోదరి ముఖాన్ని చివరిసారి చూడాలని పట్టుబట్టింది. తీరా శవపేటిక తెరిచి చూడగా అక్కడ కనిపించిన దృశ్యం చూసి అందరి గుండెలు ఆగిపోయినంత పనైంది. ఇంతకీ ఆ మహిళ ఎవరు? ఆ రహస్యం ఏంటో తెలుసుకుందాం..
ఎవరీ ఎసీ డన్ బార్ (Essie Dunbar)?
అమెరికాలోని సౌత్ కరోలినాలో నివసించే ఎసీ డన్ బార్ కథ ఇది. 1885లో జన్మించిన ఎసీ జీవితం చాలా సాధారణంగా సాగిపోయేది. అయితే ఆమెకు ‘మిర్గి’ (Epilepsy – ఫిట్స్) వ్యాధి ఉండేది. ఆ కాలంలో ఈ వ్యాధి గురించి వైద్యులకు పూర్తి అవగాహన ఉండేది కాదు. 1915 వేసవిలో ఒక రోజు ఎసీకి అకస్మాత్తుగా ఫిట్స్ రావడంతో ఆమె కింద పడిపోయింది. కుటుంబ సభ్యులు వెంటనే డాక్టర్ డి.కె. బ్రిగ్స్‌ను పిలిపించారు. ఆయన ఆమెను పరీక్షించి ఎసీ చనిపోయిందని ప్రకటించారు. అప్పట్లో వైద్య సదుపాయాలు తక్కువగా ఉండటంతో ఇలాంటి పొరపాట్లు జరుగుతుండేవి.
అంత్యక్రియల ఏర్పాట్లు
ఎసీ మరణంతో కుటుంబం శోకసంద్రంలో మునిగిపోయింది. మరుసటి రోజే అంత్యక్రియలు నిర్వహించాలని నిర్ణయించారు. వేరే ఊరిలో ఉంటున్న ఆమె సోదరి కోసం కొంత సమయం వేచి చూశారు. ముగ్గురు పాస్టర్లు కలిసి ప్రార్థనలు పూర్తి చేశారు. కానీ సోదరి రాకపోవడంతో, ఇక ఆలస్యం చేయకూడదని ఎసీ ఉన్న శవపేటికను ఆరడుగుల లోతులో సమాధి చేశారు.
తిరిగి బతికి వచ్చిన మహిళ
సమాధి చేసిన కొద్ది నిమిషాలకే ఎసీ సోదరి అక్కడికి చేరుకుంది. తన సోదరిని అప్పుడే సమాధి చేశారని తెలిసి ఆమె తల్లడిల్లిపోయింది. తన సోదరి ముఖాన్ని చివరిసారి చూడాలని, శవపేటికను బయటకు తీయాలని పట్టుబట్టింది. తప్పనిసరి పరిస్థితుల్లో కుటుంబ సభ్యులు సమాధిని తవ్వి శవపేటికను బయటకు తీశారు.
పేటిక మూత తెరవగానే అక్కడున్న వారంతా నిర్ఘాంతపోయారు. చనిపోయిందనుకున్న ఎసీ డన్ బార్ అకస్మాత్తుగా లేచి కూర్చుని తన సోదరిని చూసి నవ్వింది! ఈ దృశ్యం ఎంత భయంకరంగా ఉందంటే.. అక్కడ ప్రార్థనలు చేసిన ముగ్గురు పాస్టర్లు భయంతో సమాధి గోతులో పడిపోయారు. అందులో ఒకరికి పక్కటెముకలు కూడా విరిగాయి. ఎసీని చూసి ఆమె కుటుంబ సభ్యులు కూడా దెయ్యం అనుకుని పరుగులు తీశారు. ఎసీ పేటికలో నుండి బయటకు వచ్చి వారి వెంటే నడవడంతో భయం రెట్టింపైంది.
ఆ తర్వాత ఏమైంది?
ఆ భయంకర అనుభవం తర్వాత ఎసీ మళ్ళీ సాధారణ జీవితంలోకి వచ్చింది. 1962లో ఆమె తన 77వ ఏట ఆసుపత్రిలో మరణించింది. ఈసారి ఆమె మరణం నిజమైనది. అప్పటి స్థానిక పత్రికలు “సౌత్ కరోలినా మహిళకు చివరిసారిగా జరిగిన అంత్యక్రియలు” అనే శీర్షికలతో వార్తలు ప్రచురించాయి.