ఉత్తరప్రదేశ్లోని మెయిన్పురికి చెందిన 16 ఏళ్ల బాలిక, కుటుంబ సభ్యులతో చిన్నపాటి వివాదం కారణంగా ఇంటి నుంచి బయటకు వచ్చి నోయిడాలోని బంధువుల ఇంటికి వెళ్లాలని నిర్ణయించుకుంది.
ఆగస్టు 4 రాత్రి, భారీ వర్షం కురుస్తున్న సమయంలో ఆమె పొరపాటున పారీ చౌక్ ప్రాంతంలో బస్సు దిగింది. చిమ్మచీకటిగా ఉన్న అర్ధరాత్రి వేళ, తాను చేరుకోవాల్సిన గమ్యస్థానానికి వెళ్లేందుకు బస్సు కోసం ఎదురుచూస్తుండగా, అక్కడికి వచ్చిన ఒక ఖాళీ ప్రైవేట్ స్లీపర్ బస్సును సహాయం కోసం ఆశ్రయించింది. ఆ బస్సు నోయిడా సెక్టార్ 63 వైపు వెళ్తోందని చెప్పి, డ్రైవర్ మరియు కండక్టర్ ఆ బాలికను బస్సు ఎక్కించుకున్నారు.
అయితే వాస్తవానికి ఆ బస్సు ఢిల్లీ వైపు వెళ్తోంది. ప్రయాణం మొదలైన కొద్దిసేపటికే బస్సులో ఇతర ప్రయాణికులు ఎవరూ లేకపోవడాన్ని ఆసరాగా చేసుకున్న డ్రైవర్, కండక్టర్.. చంపేస్తామని బెదిరించి బాలికపై లైంగిక దాడికి పాల్పడ్డారు. దాదాపు 47 కిలోమీటర్ల మేర ఢిల్లీ వైపు ప్రయాణించిన వారు, కశ్మీరీ గేట్ ప్రాంతంలో ఆ బాలికను ఒంటరిగా దింపేసి అక్కడి నుంచి పరారయ్యారు. ఆ అర్ధరాత్రి వేళ కూడా మనోధైర్యాన్ని కోల్పోని ఆ బాలిక, నేరుగా కశ్మీరీ గేట్ పోలీస్ స్టేషన్కు వెళ్లి తనపై జరిగిన పైశాచిక దాడిపై ఫిర్యాదు చేసింది.
ఈ దిగ్భ్రాంతికర ఫిర్యాదును అందుకున్న పోలీసులు వెంటనే రంగంలోకి దిగి సీసీటీవీ దృశ్యాల ఆధారంగా ముమ్మర దర్యాప్తు చేపట్టారు. నిందితులైన డ్రైవర్ కుల్దీప్, కండక్టర్ సందీప్లను ఢిల్లీలో అరెస్ట్ చేయడంతో పాటు, ఫోరెన్సిక్ పరీక్షల నిమిత్తం ఆ బస్సును కూడా సీజ్ చేశారు. ఈ దారుణ ఘటన ప్రజా రవాణాలో మహిళల భద్రత, రాత్రి వేళల్లో జీపీఎస్ (GPS) వంటి నిఘా పర్యవేక్షణల అవసరాన్ని మరోసారి తెరపైకి తేవడమే కాకుండా.. 2012 నాటి ‘నిర్భయ’ ఉదంతపు చేదు జ్ఞాపకాలను ప్రజల్లో మళ్లీ గుర్తుచేసింది.
Leave a Reply