కేరళ: కేరళలోని వయనాడ్ జిల్లాలో కురుస్తున్న భారీ వర్షాల కారణంగా మరోసారి ఘోరమైన కొండచరియలు విరిగిపడి (Landslide) తీవ్ర విషాదాన్ని మిగిల్చాయి.
మేప్పాడి సమీపంలో వయనాడ్-కల్లాడి టన్నెల్ నిర్మాణ పనులు జరుగుతున్న ప్రాంతంలో అకస్మాత్తుగా సుమారు 22.6 సెం.మీ. భారీ వర్షం కురిసింది. దీని ఫలితంగా, టన్నెల్ పనుల కోసం తవ్వి ఉంచిన మట్టి భారీగా కుప్పకూలింది. ఈ కొండచరియల ధాటికి ఒక ఇల్లు, ఒక చర్చి పూర్తిగా ధ్వంసమయ్యాయి. అంతేకాకుండా, అక్కడున్న ఒక బస్టాండ్, ఒక వంతెన మట్టిలో పూర్తిగా కలిసిపోయాయి. ఈ ప్రమాదంలో కార్మికులను తీసుకెళ్తున్న రెండు బస్సులు మట్టిలో చిక్కుకుపోగా, ఇప్పటివరకు 5గురు ప్రాణాలు కోల్పోయారు. మరికొందరు గల్లంతైనట్లు అనుమానిస్తున్నారు.
మట్టిలో చిక్కుకున్న 6గురు వలస కార్మికులను రెస్క్యూ టీమ్స్ కాపాడి, చికిత్స కోసం మేప్పాడి ఆసుపత్రికి తరలించారు. ప్రస్తుతం జాతీయ విపత్తు నిర్వహణ బృందం (NDRF) మరియు స్థానిక అధికారులు యుద్ధ ప్రాతిపదికన సహాయక చర్యలు చేపడుతున్నారు. అయితే, కొండచరియలు విరిగిపడిన ప్రాంతంలో ఇంకా భారీ వర్షం కురుస్తుండటంతో సహాయక చర్యలకు ఆటంకం ఏర్పడుతోంది. దీనితో భయాందోళనకు గురైన స్థానికులు సురక్షిత ప్రాంతాలకు తరలివెళ్తున్నారు.
గత 2024లో వయనాడ్లో సంభవించిన ఘోర కొండచరియల విపత్తులో 420 మందికి పైగా ప్రాణాలు కోల్పోయిన చేదు జ్ఞాపకాలు ఇంకా ప్రజల మదిలో మెదులుతూనే ఉన్నాయి. ఆ గాయం మానకముందే, మళ్ళీ అదే మేప్పాడి ప్రాంతంలో ఇలాంటి ఘటన జరగడం కేరళ రాష్ట్రం మొత్తాన్ని శోకసంద్రంలో ముంచెత్తింది.