పాలిటానా మాంసాహార నిషేధం: నేటి కాలంలో మెజారిటీ ప్రజలు మాంసాహారాన్ని ఎంతో ఇష్టంగా తింటారు. శాఖాహారంతో పాటు మాంసాహారంలో కూడా అనేక రకాలు అందుబాటులో ఉన్నాయి. ప్రజలు తమ అభిరుచికి అనుగుణంగా వివిధ రుచులను ఆస్వాదిస్తుంటారు.
అయితే, ప్రపంచంలోనే మాంసాహారం పూర్తిగా నిషేధించబడిన ఒక నగరం ఉందని తెలిస్తే మీరు ఆశ్చర్యపోతారు. ఈ నగరంలో ఎన్నో హోటళ్లు ఉన్నప్పటికీ, అన్ని చోట్లా కేవలం శుద్ధ శాఖాహార భోజనం మాత్రమే లభిస్తుంది. ఈ నగరంలో మాంసాహారం తినడం పక్కన పెడితే, దానిని అమ్మడం లేదా కొనడం కూడా నేరమే. మీరు ఏదైనా దుకాణానికి వెళ్లి మాంసాహారం కావాలని అడిగితే, మీకు జైలు శిక్ష కూడా పడవచ్చు.
ఆ నగరం మరే దేశంలోనో లేదు.. మన భారతదేశంలోనే ఉంది. గుజరాత్లోని భావ్నగర్ జిల్లాలో ఉన్న పాలిటానా నగరాన్ని శుద్ధ శాఖాహార నగరంగా ప్రకటించారు. ఇక్కడ మాంసాహారం దొరకకపోవడం అనేది ఏదో ఒక ట్రెండ్ కాదు, ఇక్కడి ప్రజలు అహింసా వాదులు. అందుకే ఈ నగరం ప్రపంచం ముందు అహింసకు అతిపెద్ద ఉదాహరణగా నిలుస్తోంది.
మాంసం అమ్మినా, కొన్నా జైలు శిక్షే
ఇక్కడ మాంసం, చేపలు మరియు గుడ్లు అమ్మడం పూర్తిగా చట్టవిరుద్ధం. నిబంధనలను ఉల్లంఘించి ఎవరైనా మాంసాన్ని విక్రయించినా లేదా వడ్డించినా భారీ జరిమానా చెల్లించాల్సి ఉంటుంది. అంతేకాకుండా జైలుకు వెళ్లాల్సి వస్తుంది. ఈ నగరంలోని చిన్న హోటల్ నుండి పెద్ద రెస్టారెంట్ల వరకు ప్రతిచోటా శుద్ధ శాఖాహారమే వడ్డిస్తారు. ఈ నగరం ప్రపంచవ్యాప్తంగా ‘వెజిటేరియన్ సిటీ ఆఫ్ ద వరల్డ్’ గా గుర్తింపు పొందింది.
మాంసాహారం ఎందుకు నిషేధించబడింది?
ఒకప్పుడు పాలిటానా నగరంలో కూడా ఇతర ప్రాంతాల మాదిరిగానే మాంసాహారాన్ని అమ్మేవారు. అయితే, 2014లో జైన సముదాయానికి చెందిన పలువురు సాధువులు నగరంలో మాంసాహార విక్రయాలకు వ్యతిరేకంగా నిరాహార దీక్ష చేపట్టారు. నగరంలోని కబేళాలను (మాంసం దుకాణాలను) మూసివేయాలని, జీవహింసను ఆపాలని వారు డిమాండ్ చేశారు. చాలా రోజుల పాటు ఈ ఉద్యమం కొనసాగడంతో, ప్రభుత్వం వారి డిమాండ్ను అంగీకరించి నగరంలో మాంసం విక్రయాలను నిషేధించింది. అలాగే జంతువుల హత్యను చట్టవిరుద్ధంగా ప్రకటించింది. అప్పటి నుండి పాలిటానా నగరం పూర్తి శాఖాహార నగరంగా మారిపోయింది.