చికెన్, మటన్ వంటి మాంసాహారాలను ఇష్టంగా తినే వారి వల్ల ప్రపంచంలో ఒక కొత్త సంక్షోభం తలెత్తిందని ఐక్యరాజ్యసమితి విడుదల చేసిన నివేదిక హెచ్చరించింది. గత 60 ఏళ్లలో ప్రపంచ ఆహారపు అలవాట్లు పూర్తిగా మారిపోయాయి. ప్రజలు శాకాహారాన్ని వదిలి, మాంసాహారం వైపు విపరీతంగా మొగ్గు చూపుతున్నారు. దీనివల్ల పర్యావరణానికి ఊహించని ముప్పు వాటిల్లుతోంది.
భయంకరమైన గణాంకాలు: ఐక్యరాజ్యసమితికి చెందిన ఆహార, వ్యవసాయ సంస్థ (FAO) విడుదల చేసిన ఈ నివేదిక శాస్త్రవేత్తలను, పర్యావరణవేత్తలను ఆందోళనకు గురిచేస్తోంది.
- వినియోగం రెట్టింపు: 1961లో ప్రపంచవ్యాప్తంగా తలసరి మాంసం వినియోగం సగటున 25 కేజీలు ఉండగా, 2022 నాటికి అది 47 కేజీలకు చేరింది.
- చికెన్ రికార్డు: 1961లో ఒక వ్యక్తి ఏడాదికి సగటున 3 కేజీల కంటే తక్కువ చికెన్ తినేవారు, కానీ 2022 నాటికి అది 17 కేజీలకు పెరిగింది. అంటే చికెన్ వినియోగం సుమారు 6 రెట్లు పెరిగింది.
- పంది మాంసం & బీఫ్: పంది మాంసం వినియోగం రెట్టింపు అయ్యి 15 కేజీలకు చేరగా, బీఫ్ వినియోగం సుమారు 9 కేజీల వద్ద స్థిరంగా ఉంది.
పెరుగుతున్న కాలుష్యం: ప్రస్తుతం గ్రీన్హౌస్ వాయువుల ఉద్గారాలకు ఫ్యాక్టరీలు, వాహనాల తర్వాత వ్యవసాయం, పశుపోషణే రెండో అతిపెద్ద కారణాలుగా మారాయి. వాతావరణాన్ని వేడెక్కించే వాయువుల్లో పశుపోషణ వాటానే 12% నుండి 20% వరకు ఉంది. రాబోయే పదేళ్లలో ఈ రంగం వల్ల వచ్చే కాలుష్యం మరో 7.6% పెరిగే అవకాశం ఉంది.
అభివృద్ధి చెందుతున్న దేశాల్లో మార్పు: ఆర్థికాభివృద్ధి, పట్టణీకరణ పెరిగిన దేశాల్లో ప్రజల జీవనశైలి మారింది. సంప్రదాయ ఆహారపు అలవాట్లను వదిలి, మాంసాహారాన్ని ఒక ‘స్టేటస్ సింబల్’గా మార్చుకుంటున్నారు. దీనివల్ల మన భూమి తీవ్రమైన పర్యావరణ ధరను చెల్లించాల్సి వస్తోంది.
అమీర్-గరీబ్ అంతరం: నివేదికలోని మరో బాధాకరమైన నిజం ఏంటంటే, ధనిక దేశాలు మాంసాహారాన్ని విపరీతంగా తింటుంటే, పేద దేశాల్లో ఇంకా ఆకలి చావులు కొనసాగుతున్నాయి. అక్కడ ప్రజలకు కనీసం పోషకాహారం కూడా దొరకని పరిస్థితి ఉంది.
శాస్త్రవేత్తల అసహనం: పర్యావరణానికి ఇంతటి ముప్పు ఉన్నప్పటికీ, ఐక్యరాజ్యసమితి సంస్థ (FAO) మాత్రం ధనిక దేశాలకు కఠినమైన సలహాలు ఇవ్వకుండా, పద్ధతులను మెరుగుపరుచుకోమని ‘సాఫ్ట్’గా మాట్లాడటంపై శాస్త్రవేత్తలు తీవ్ర అసహనం వ్యక్తం చేస్తున్నారు. మాంసాహారాన్ని తగ్గించి, ‘ప్లాంట్-బేస్డ్ డైట్’ (మొక్కల ఆధారిత ఆహారం) వైపు మళ్లితేనే వాతావరణ మార్పులను అదుపు చేయగలమని వారు స్పష్టం చేస్తున్నారు.