విమానాశ్రయంలోని సందడి వాతావరణంలో అభిమానులకు తమ అభిమాన తారలు ఎదురుపడటం ఎప్పుడూ ఒక మధురానుభూతే.
అందులోనూ భారత క్రికెట్ జట్టు యువ డాషింగ్ ఓపెనర్ అభిషేక్ శర్మనే నేరుగా కలిస్తే? సరిగ్గా అలాంటి మరపురాని క్షణమే ఓ యువతికి ఎదురైంది.
ఎయిర్‌పోర్ట్ నుంచి అభిషేక్ శర్మ బయటకు వస్తుండగా, అతడిని చూసిన సదరు యువతి ఆనందం పట్టలేక చేతిలో మార్కర్ పెన్ను పట్టుకుని పరుగెత్తుకుంటూ వచ్చింది. అతడి పేరును గట్టిగా పిలుస్తూ, ఒక సెల్ఫీతో పాటు ఆటోగ్రాఫ్ ఇవ్వాల్సిందిగా ఎంతో ప్రేమగా కోరింది.
ఆ అభిమాని ఆత్రుతను చూసిన అభిషేక్ శర్మ, అక్కడే ఆగి ఆటోగ్రాఫ్ ఇచ్చేందుకు అంగీకరించాడు. ఆమె తన చేతి మణికట్టుపై సంతకం పెట్టాలని కోరింది. అయితే, సరిగ్గా ఆ మరుక్షణంలోనే అక్కడ ఉన్న వారందరినీ నవ్వించిన ఒక ఆసక్తికర సంఘటన చోటుచేసుకుంది.
తన అభిమాన క్రికెటర్ తన పక్కనే నిల్చున్నాడంటే ఆ యువతి నమ్మలేకపోయింది. అది నిజమా లేక కలా అన్న సందేహంతో, అభిషేక్ శర్మ ఆమె చేతిపై ఆటోగ్రాఫ్ ఇస్తున్న సమయంలోనే, “నేను మిమ్మల్ని ఒకసారి తాకి చూడొచ్చా?” అని అడిగింది.
అడగడమే కాకుండా, ఎదురుగా ఉన్నది నిజంగా వ్యక్తేనా అని నిర్ధారించుకుంటున్నట్లుగా.. తన వేలితో అభిషేక్ చేతిని రెండు మూడు సార్లు తాకి చూసింది! ఈ వింతైన, అమాయకపు చేష్టతో ఆమె సిగ్గుతో ముఖం దాచుకుని నవ్వడం మొదలుపెట్టింది.
అభిషేక్ శర్మ చాలా కూల్‌గా నవ్వుతూ సంతకం చేసి తన దారిన వెళ్లిపోయాడు. ఆటోగ్రాఫ్ ఉన్న తన చేతిని చూసుకుంటూ ఆ యువతి సిగ్గు, ఆనందం కలగలిసిన ముఖంతో గాల్లో తేలిపోతూ గంతులు వేసింది.
ఒక క్రికెటర్‌‌కు ఆటోగ్రాఫ్ ఇవ్వడం సాధారణ విషయమే కావచ్చు; కానీ ఆ వీరాభిమానికి మాత్రం అది జీవితాంతం గుర్తుండిపోయే ఒక తీపి కలగా మారింది. దీనికి సంబంధించిన వీడియో ప్రస్తుతం సోషల్ మీడియాలో విపరీతంగా వైరల్ అవుతోంది.
Leave a Reply