మనిషి ఆయుష్షు ఎంత? అనే ప్రశ్నకు సమాధానం తెలుసుకోవాలని ప్రతి ఒక్కరికీ ఆసక్తి ఉంటుంది. మనం ఎంత కాలం బతుకుతామో తెలిస్తే, జీవితం పట్ల మన నిర్ణయాలు మారతాయని చాలామంది భావిస్తారు. తాజాగా జరిగిన ఒక పరిశోధన ఈ ప్రశ్నకు ఒక ఆశ్చర్యకరమైన సమాధానాన్ని ఇచ్చింది. ఒక వ్యక్తి ఎంత కాలం జీవిస్తాడనే సంకేతాలు శరీర లోపల కాదు, బయట కనిపించే గోళ్లలోనే దాగి ఉన్నాయని నిపుణులు చెబుతున్నారు.
మన శరీర అంతర్గత ఆరోగ్యం తరచుగా బాహ్య అవయవాలపై ప్రతిబింబిస్తుంది. చర్మం, జుట్టు మరియు కళ్లే కాకుండా, గోళ్లు కూడా శరీర స్థితిని సూచిస్తాయని వైద్యులు అంటున్నారు. ముఖ్యంగా, గోళ్ల పెరుగుదల వేగం మన జీవక్రియ వయస్సు (Biological Age) మరియు అంతర్గత అవయవాల ఆరోగ్యాన్ని తెలియజేస్తుందనే అభిప్రాయం బలపడుతోంది.
హార్వర్డ్ విశ్వవిద్యాలయానికి చెందిన ప్రముఖ జన్యుశాస్త్రవేత్త డాక్టర్ డేవిడ్ సింక్లెయిర్, వృద్ధాప్యంపై లోతైన పరిశోధనలు చేస్తూ ఈ విషయాన్ని స్పష్టం చేశారు. “మీ గోళ్లు వేగంగా పెరుగుతూ, వాటిని తరచుగా కత్తిరించాల్సి వస్తుంటే, మీ శరీరంలోని కీలక అవయవాలు నెమ్మదిగా వృద్ధాప్యానికి చేరుకుంటున్నాయని అర్థం. అంటే మీ అవయవాలన్నీ ఆరోగ్యంగా ఉన్నాయని దీని అర్థం” అని ఆయన వివరించారు.
గోళ్ల పెరుగుదల – పరిశోధనల ఫలితం: ఇది కేవలం ఊహ కాదు. 1979లో శాస్త్రవేత్తలు వందలాది మంది గోళ్ల పెరుగుదలను సుదీర్ఘకాలం పాటు అధ్యయనం చేశారు. 30 ఏళ్ల వయస్సు తర్వాత, గోళ్ల పెరుగుదల వేగం ఏటా సగటున 0.5 శాతం తగ్గుతుందని ఆ అధ్యయనంలో తేలింది. వయసు పెరిగే కొద్దీ గోళ్లు సహజంగానే నెమ్మదిగా పెరుగుతాయి.
సాధారణంగా 30 ఏళ్ల వరకు గోళ్లు వేగంగా పెరుగుతాయి. ఆ తర్వాత వాటి వేగం తగ్గుతుంది. కానీ 30 ఏళ్ల తర్వాత కూడా మీ గోళ్లు వేగంగా పెరుగుతూ ఉంటే, మీ హృదయం, కాలేయం, కిడ్నీలు, ఊపిరితిత్తులు మరియు చర్మం వంటి కీలక అవయవాలు ఇంకా సమర్థవంతంగా పనిచేస్తున్నాయని అర్థం.
డాక్టర్ సింక్లెయిర్ తన గోళ్లను కత్తిరించుకున్న ప్రతిసారీ, చివరిసారి ఎప్పుడు కత్తిరించారో గుర్తుంచుకుంటారట. ఆ మధ్య గ్యాప్ తక్కువగా ఉంటే, అది తన ఆరోగ్యానికి మంచి సంకేతమని ఆయన భావిస్తారు.
వైజ్ఞానిక కారణం: వయసు పెరిగే కొద్దీ రక్త ప్రసరణ తగ్గుతుందని శాస్త్రీయంగా నిరూపితమైంది. దీనివల్ల గోళ్లకు చేరే పోషకాలు తగ్గి, వాటి పెరుగుదల మందగిస్తుంది. పోషకాహార లోపం, హార్మోన్ల మార్పులు కూడా దీనిపై ప్రభావం చూపుతాయి. ఉదాహరణకు గర్భధారణ సమయంలో గోళ్లు వేగంగా పెరుగుతాయి.
గోళ్లు కేవలం ఆయుష్షుకు మాత్రమే కాదు, అనేక రోగాలకు కూడా సంకేతాలు. మీ గోళ్లపై ఎక్కువ గీతలు లేదా మచ్చలు ఉంటే జాగ్రత్తగా ఉండాలి. వృద్ధులలో గోళ్లపై గీతలు సహజమే కానీ, యవ్వనంలో ఉండేవారికి ఇవి జింక్, ఐరన్, కాల్షియం మరియు విటమిన్-ఏ లోపాలను సూచిస్తాయి. అందుకే మీ గోళ్లను నిర్లక్ష్యం చేయకుండా, మీ శరీరం మీకు ఇస్తున్న సంకేతాలుగా భావించాలని నిపుణులు సూచిస్తున్నారు.