దేశాలు, సంస్కృతులు వేరైనా.. మానవ సంబంధాలను కలిపే స్వచ్ఛమైన ప్రేమ, ఆప్యాయతలకు ఎలాంటి సరిహద్దులూ ఉండవని నిరూపించే ఒక భావోద్వేగపూరితమైన వీడియో ప్రస్తుతం సోషల్ మీడియాలో విపరీతంగా వైరల్ అవుతోంది.
అమెరికా నుంచి భారతదేశానికి తిరిగి బయలుదేరిన భారతీయ దంపతులకు, వారి పక్కింటి అమెరికన్ మహిళ కన్నీటి వీడ్కోలు పలికిన దృశ్యం నెటిజన్ల మనసులను కదిలిస్తోంది.
అమెరికాలో నివసిస్తున్న భారతీయ దంపతులు తమ నివాసాన్ని ఖాళీ చేసి తిరిగి స్వదేశానికి వచ్చేందుకు ఏర్పాట్లు చేసుకున్నారు. ఆ సమయంలో వారికి ఇరుగుపొరుగున ఉంటూ ఎంతో ఆత్మీయురాలిగా మారిన ఒక అమెరికన్ మహిళ, వారిని సాగనంపేందుకు అక్కడికి వచ్చింది.
విజయ్ కొక్కెరగడ్డ అనే వ్యక్తి ఇన్స్టాగ్రామ్లో పంచుకున్న ఈ వీడియోలో, ఆ మహిళ దంపతుల వద్దకు వచ్చి ఆత్మీయంగా కౌగిలించుకోవడం కనిపిస్తుంది. మొదట్లో సాధారణంగా సాగిన వీడ్కోలు.. కాసేపట్లోనే ఆ మహిళ తన కన్నీళ్లను ఆపుకోలేక వారి భుజాలపై వాలి వెక్కివెక్కి ఏడ్చేంతగా మారిపోయింది.
“నేను మిమ్మల్ని చాలా మిస్ అవుతాను” అంటూ ఆమె గద్గద స్వరంతో బాధపడుతూ, ఆ దంపతులను వదిలిపెట్టలేక సుదీర్ఘ సమయం పాటు గట్టిగా హత్తుకుని ఉండిపోయింది. ఆ భావోద్వేగ క్షణాల్లో భారతీయ దంపతులు కూడా ఆమెను ఆప్యాయంగా దగ్గరకు తీసుకుని, ఓదారుస్తూ నచ్చజెప్పే ప్రయత్నం చేశారు. ఈ వీడ్కోలు దృశ్యాన్ని తమ స్నేహితుడు ఒకరు మొబైల్లో వీడియో తీస్తున్నారన్న విషయం ఆ సమయంలో ఆ దంపతులకు కూడా తెలియదు.
ఎయిర్పోర్టుకు బయలుదేరే ముందు పంచుకున్న ఆ చివరి క్షణాల స్వచ్ఛమైన ప్రేమ, వారి జీవితాంతం గుర్తుండిపోయే ఒక తీపి జ్ఞాపకంగా మారింది.
విదేశాల్లో నివసించి తిరిగి వచ్చే చాలామంది, తాము అక్కడి పరిసరాల్లో సంపాదించుకున్న మంచి స్నేహితులు, ఇరుగుపొరుగు వారిని విడిచిపెట్టేటప్పుడు కలిగే భావోద్వేగాన్ని గుర్తుచేసుకుంటూ ఈ వీడియో కింద తమ అనుభవాలను కామెంట్స్ రూపంలో పంచుకుంటున్నారు. ఎలాంటి ఆడంబరాలూ లేకుండా నిత్య జీవితంలో పుట్టిన స్వచ్ఛమైన బంధానికి, నిష్కల్మషమైన స్నేహానికి ఈ వీడ్కోలు నిదర్శనంగా నిలిచింది.