లైఫ్ స్టైల్ డెస్క్: ప్రతి ఇంట్లోనూ గోడ గడియారం ఉండటం సహజం. మనం కేవలం సమయం చూసుకోవడానికే దానిని ఉపయోగిస్తాం. కానీ, ఈ గడియారానికి, వాస్తుశాస్త్రానికి మధ్య విడదీయలేని సంబంధం ఉందని మీకు తెలుసా? వాస్తు ప్రకారం గడియారాన్ని సరైన దిశలో ఉంచితే ఐశ్వర్యం సిద్ధిస్తుంది. అదే తప్పుడు దిశలో ఉంటే మాత్రం మీ అదృష్టాన్ని అది కాలరాస్తుందని వాస్తు నిపుణులు హెచ్చరిస్తున్నారు. గడియారం విషయంలో పాటించాల్సిన ఆ ఆసక్తికరమైన నియమాలు ఏంటో ఇప్పుడు చూద్దాం.
ఏ దిశలో ఉండాలి? ఎక్కడ ఉండకూడదు?
1. దక్షిణం వైపు అస్సలు వద్దు! వాస్తుశాస్త్రం ప్రకారం ఇంటికి దక్షిణ దిశ గోడపై గడియారాన్ని ఎప్పుడూ ఉంచకూడదు. ఈ దిశను అశుభంగా పరిగణిస్తారు. దక్షిణం వైపు గడియారం ఉంటే జాతకంలో చంద్రుడు, గురుడు, శుక్ర గ్రహాలు బలహీనపడతాయి. దీనివల్ల ఇంట్లో నిరంతరం అశాంతి, ప్రతికూల ఆలోచనలు పెరుగుతాయి. కుటుంబ సభ్యుల మధ్య గొడవలు జరిగే అవకాశం ఉంది. కాబట్టి మీ ఇంట్లో గడియారం దక్షిణం వైపు ఉంటే వెంటనే తీసేయండి.
2. తూర్పు దిశ: ప్రగతికి సంకేతం గడియారాన్ని తూర్పు దిశలో ఉంచడం అత్యంత శుభప్రదం. ఈ దిశలో ఉంచడం వల్ల గురు, శని, కుజ గ్రహాలు బలపడతాయి. ఇది ఇంట్లో సంపదను పెంచడమే కాకుండా, కుటుంబ సభ్యుల అభివృద్ధికి తోడ్పడుతుంది. ఇంట్లో సుఖసంతోషాలు వెల్లివిరుస్తాయి.
3. ఉత్తర దిశ: కుబేర స్థానం ఆర్థిక పరిస్థితి మెరుగుపడాలంటే గడియారాన్ని ఉత్తర దిశలో అమర్చడం మేలు. ఇది ఉద్యోగ, వ్యాపారాల్లో పురోగతిని ఇస్తుంది. సాక్షాత్తు కుబేర స్థానంగా భావించే ఉత్తర దిశలో గడియారం ఉండటం వల్ల ఆర్థిక ఇబ్బందులు తొలగిపోయి, ఐశ్వర్యం చేకూరుతుంది.
ఆకారం కూడా ముఖ్యం!
ఇంట్లో శాంతి, సమృద్ధి నెలకొనాలంటే వృత్తాకారంలో (రౌండ్ షేప్) ఉండే గడియారాలను ఎంచుకోవడం మంచిది. ఇది ఇంట్లో సానుకూల శక్తిని నిరంతరం ప్రసరింపజేస్తుంది.