సాధారణంగా ప్రతి ఇంట్లో గ్యాస్ సిలిండర్ ఉంటుంది. ఇప్పుడు కట్టెల పొయ్యిల వాడకం తగ్గి అందరూ గ్యాస్ సిలిండర్లనే వాడుతున్నారు. అయితే, సిలిండర్ వాడేటప్పుడు కొన్ని జాగ్రత్తలు తీసుకోవడం తప్పనిసరి. ముఖ్యంగా గ్యాస్ సిలిండర్లకు కూడా ‘ఎక్స్‌పైరీ డేట్’ (గడువు తేదీ) ఉంటుందని మీకు తెలుసా? సిలిండర్ గడువు తేదీని ఎలా గుర్తించాలో ఇప్పుడు వివరంగా చూద్దాం.
చాలామంది సిలిండర్ తీసుకునేటప్పుడు గ్యాస్ లీక్ అవుతుందా లేదా? బరువు సరిగ్గా ఉందా? అని మాత్రమే చూస్తారు. కానీ దానిపై ఉండే కోడ్ నంబర్‌ను గమనించరు. సిలిండర్ పట్టుకునే ఇనుప పట్టీల లోపలి భాగంలో A, B, C, D అనే అక్షరాలతో పాటు ఒక రెండంకెల సంఖ్య ఉంటుంది. వీటి అర్థం ఏమిటంటే:
అక్షరాలు (నెలలను సూచిస్తాయి):
- A – జనవరి నుండి మార్చి వరకు.
- B – ఏప్రిల్ నుండి జూన్ వరకు.
- C – జూలై నుండి సెప్టెంబర్ వరకు.
- D – అక్టోబర్ నుండి డిసెంబర్ వరకు.
అంకెలు (సంవత్సరాన్ని సూచిస్తాయి): ఉదాహరణకు, అంకె 26 అని ఉంటే, అది 2026 సంవత్సరాన్ని సూచిస్తుంది. ఒకవేళ మీ సిలిండర్‌పై “A-26” అని ఉంటే, ఆ సిలిండర్‌ను మార్చి 2026 వరకు మాత్రమే పరీక్షించకుండా వాడవచ్చని అర్థం. ఆ గడువు ముగిసిన సిలిండర్లను వాడటం వల్ల ప్రమాదాలు జరిగే అవకాశం ఉందని నిపుణులు హెచ్చరిస్తున్నారు.
గ్యాస్ ట్యూబ్ మరియు రెగ్యులేటర్: తక్కువ ధరలో దొరుకుతున్నాయని నాణ్యత లేని పైపులు, రెగ్యులేటర్లను వాడకండి. ఇవి గ్యాస్ లీకేజీకి ప్రధాన కారణం అవుతాయి. ఎల్లప్పుడూ BIS హాల్‌మార్క్ ఉన్న పైపులు, రెగ్యులేటర్లను మాత్రమే వాడటం సురక్షితం.