అమెరికాలోని టెక్సాస్ నుండి ఒక దిగ్భ్రాంతికరమైన వార్త వెలుగులోకి వచ్చింది. ఇక్కడ ఒక 9 ఏళ్ల చిన్నారి సోషల్ మీడియా ఛాలెంజ్‌ను పూర్తి చేసే క్రమంలో ప్రాణాలు కోల్పోయింది. ఆ కుటుంబం ఇప్పుడు పుట్టెడు దుఃఖంలో మునిగిపోయింది.
కర్టిస్ మరియు వెండి బ్లాక్‌వెల్ దంపతుల కుమార్తె, జాక్లిన్ కే బ్లాక్‌వెల్ ఫిబ్రవరి 3న మరణించింది. ఆమె మెడకు తాడు చుట్టుకొని ఉండటం గమనించారు. ఆమె సోషల్ మీడియాలో వైరల్ అవుతున్న ‘బ్లాక్ అవుట్’ లేదా ‘చోకింగ్’ (Choking) ఛాలెంజ్‌లో పాల్గొన్నట్లు తెలిసింది. ఈ ఛాలెంజ్‌లో భాగంగా చిన్న పిల్లలు ఆక్సిజన్ అందక స్పృహ తప్పిపోయే వరకు తమ శ్వాసను బిగబట్టి ఉంచుతారు.
టెక్సాస్‌లో 9 ఏళ్ల బాలిక మృతి: జాక్లిన్ టెక్సాస్‌లోని స్టీఫెన్‌విల్లేలో జన్మించింది. ఆమెకు డ్రాయింగ్, పెయింటింగ్, పజిల్స్ మరియు రకరకాల ఛాలెంజ్‌లలో పాల్గొనడం అంటే చాలా ఇష్టం. జాక్లిన్ ఈ ఛాలెంజ్‌కు సంబంధించిన వీడియోను చూసి తన నానమ్మకు చూపించగా.. ఆమె అటువంటి పనులు ఎప్పుడూ చేయవద్దని హెచ్చరించింది.
ఒక నివేదిక ప్రకారం, జాక్లిన్ మరణించిన రోజు ఉదయం స్కూల్‌కు వెళ్లే ముందు ఇంటి ఆవరణలో ఆడుకోవడానికి వెళ్ళింది. అక్కడ ఉండాల్సిన దానికంటే ఎక్కువ నిశ్శబ్దం ఉండటంతో అనుమానం వచ్చిన తండ్రి కర్టిస్ వెళ్లి చూడగా.. ఆమె అపస్మారక స్థితిలో పడి ఉంది.
తల్లిదండ్రుల హెచ్చరిక: తమ కుమార్తెను ఆ స్థితిలో చూడటం తన జీవితంలోనే అత్యంత భయంకరమైన అనుభవమని కర్టిస్ ఆవేదన వ్యక్తం చేశారు. “ఆమెను రక్షించడానికి నేను చేయగలిగినదంతా చేశాను. మెడకు ఉన్న తాడును తీసివేసి, సహాయం అందే వరకు సిపిఆర్ (CPR) చేయడానికి ప్రయత్నించాను” అని ఆయన చెప్పారు.
ఈ ఘటన జరిగిన నెల తర్వాత, ఆ దంపతులు ఇతర తల్లిదండ్రులను సోషల్ మీడియా ప్రమాదాల గురించి హెచ్చరిస్తున్నారు. “ఇది జోక్ కాదు, ఆట కాదు.. ఇది జీవిత మరణాల సమస్య. మా హెచ్చరిక వల్ల కనీసం ఒక్క ప్రాణం నిలబడినా మాకు సంతృప్తిగా ఉంటుంది” అని వారు పేర్కొన్నారు.