ముంబై/న్యూఢిల్లీ: ముంబైలోని ఛత్రపతి శివాజీ మహారాజ్ అంతర్జాతీయ విమానాశ్రయంలో ఒక భారీ ప్రమాదం తప్పింది. దేశంలోని రెండు ప్రధాన విమానయాన సంస్థలు.. ఎయిర్ ఇండియా మరియు ఇండిగోకు చెందిన విమానాలు రన్‌వేపై ఒకదానికొకటి ఢీకొన్నాయి.
అదృష్టవశాత్తూ ఈ ఘటనలో ప్రయాణికులెవరికీ గాయాలు కాలేదు. అయితే భద్రతా కారణాల దృష్ట్యా రెండు విమానాలను తక్షణమే నిలిపివేశారు (గౌండెడ్).
అసలేం జరిగింది?
ఎయిర్ ఇండియా విమానం టేకాఫ్ కావడానికి సిద్ధమవుతున్న సమయంలో, ఇండిగో విమానం ల్యాండింగ్ ముగించుకుని పార్కింగ్ వైపు వెళ్తుండగా ఈ ఘటన జరిగింది.
- ఎయిర్ ఇండియా (AI 2732): ముంబై నుండి కోయంబత్తూరు వెళ్లాల్సిన ఈ విమానం పుష్‌బ్యాక్ స్థితిలో ఉంది.
- ఇండిగో (6E 791): హైదరాబాద్ నుండి వచ్చిన ఈ విమానం ల్యాండింగ్ తర్వాత టాక్సీ-వే గుండా వెళ్తోంది. ఈ క్రమంలో రెండు విమానాల కుడివైపు రెక్కలు (Right Wingtips) ఒకదానికొకటి బలంగా తగిలాయి. ఒక్కసారిగా విమానంలో కుదుపు రావడంతో ప్రయాణికులు కాసేపు భయాందోళనకు గురయ్యారు.
ఊపిరి పీల్చుకున్న ప్రయాణికులు
ప్రమాద సమయంలో రెండు విమానాల్లోనూ ప్రయాణికులు నిండుగా ఉన్నారు. ఢీకొన్న వెంటనే ఏటీసీ (ATC) మరియు గ్రౌండ్ స్టాఫ్ అప్రమత్తమయ్యారు. ప్రయాణికులందరినీ సురక్షితంగా కిందకు దించి, వారిని వేరే విమానాల్లో పంపడానికి ఏర్పాట్లు చేశారు.
డీజీసీఏ విచారణ ప్రారంభం
విమానాల రెక్కలు దెబ్బతినడంతో, పౌర విమానయాన డైరెక్టరేట్ జనరల్ (DGCA) ఈ ఘటనపై విచారణకు ఆదేశించింది. గ్రౌండ్ క్లియరెన్స్‌లో లోపం ఎక్కడ జరిగిందనే కోణంలో అధికారులు దర్యాప్తు చేస్తున్నారు. ప్రస్తుతం రెండు విమానాలను మరమ్మతుల కోసం పంపారు.
ఎయిర్‌లైన్స్ స్పందన:
- ఎయిర్ ఇండియా: టాక్సీవేపై వేచి ఉన్న సమయంలో తమ విమానం వింగ్‌టిప్ దెబ్బతిందని, ప్రయాణికుల భద్రత దృష్ట్యా విమానాన్ని నిలిపివేసి సాంకేతిక తనిఖీలు చేస్తున్నామని తెలిపింది.
- ఇండిగో: ల్యాండింగ్ తర్వాత పార్కింగ్ వైపు వెళ్తుండగా మరో విమానాన్ని తమ విమానం రెక్క తాకిందని ధృవీకరించింది. నిబంధనల ప్రకారం అధికారులకు సమాచారం ఇచ్చామని పేర్కొంది.
సాంకేతిక కారణాలు:
డీజీసీఏ ప్రాథమిక నివేదిక ప్రకారం, రెండు విమానాలు కూడా Airbus A320 మోడల్‌వే. ఎయిర్ ఇండియా విమానం (VT-TYF) టాక్సీవే C1 నుండి M4 వైపు వెళ్తుండగా, ఇండిగో విమానం (VT-IFV) టాక్సీవే B1 వద్దకు చేరుకుంది. ఆ సమయంలోనే రెండింటి కుడి రెక్కలు ఒకదానికొకటి రాసుకున్నాయి.