మహారాష్ట్రకు చెందిన ఒక వృద్ధ దంపతుల మధ్య ఉన్న ప్రేమ మరియు భక్తితో కూడిన ఒక సంఘటన ఇప్పుడు సోషల్ మీడియాలో అందరినీ కదిలిస్తోంది. ముసలితనంలోనూ వారి మధ్య తగ్గని అనురాగాన్ని చూసి నెటిజన్లు ప్రశంసల వర్షం కురిపిస్తున్నారు. ఇంతకీ కర్ణాటక రాష్ట్రంలో ఏం జరిగిందంటే?
కర్ణాటక రాష్ట్రం బెళగావి జిల్లా రాయబాగ్ తాలూకాలో చించోడి అనే గ్రామం ఉంది. దీనిని చించలి అని కూడా అంటారు. ఈ గ్రామంలో ప్రసిద్ధ గాంచిన మాయక్కా దేవి ఆలయం ఉంది. ఈ ఆలయంలో ప్రతి సంవత్సరం జాతర జరుగుతుంది. దీనికి కర్ణాటకతో పాటు మహారాష్ట్ర వంటి పొరుగు రాష్ట్రాల నుండి కూడా వేల సంఖ్యలో భక్తులు తరలివస్తారు.
ప్రపంచం మెచ్చిన భర్త ప్రేమ
మహారాష్ట్రకు చెందిన ఒక రైతు కుటుంబం గత 15 ఏళ్లుగా ఈ జాతరకు రావడం ఆనవాయితీగా పెట్టుకుంది. ప్రతి ఏటా తన భార్యను ఈ ఆలయానికి తీసుకువచ్చి దర్శనం చేయించేవాడు ఆ భర్త. అయితే, ఈ ఏడాది జాతర సమయానికి ఆ రైతు భార్య అనారోగ్యానికి గురైంది. తీవ్రమైన ఊపిరితిత్తుల వ్యాధితో బాధపడుతున్న ఆమె సొంతంగా గాలి పీల్చుకోలేని స్థితికి చేరుకుంది.
ప్రస్తుతం ఆమె ఇంట్లోనే ఆక్సిజన్ సిలిండర్ సహాయంతో శ్వాస తీసుకుంటోంది. ఈ పరిస్థితిలో బయటకు వెళ్లడం చాలా కష్టం. కానీ, “ఎలాగైనా నన్ను మాయక్కా దేవి దర్శనానికి తీసుకువెళ్లండి” అని ఆమె తన భర్తను కోరింది.
ఆక్సిజన్ సిలిండర్‌తో ఆలయానికి..
భార్య కోరికను నెరవేర్చాలని నిర్ణయించుకున్న ఆ వృద్ధుడు, వెంటనే వైద్యులను సంప్రదించి సలహా తీసుకున్నారు. వైద్యులు సూచించిన భద్రతా జాగ్రత్తల ప్రకారం, ఆక్సిజన్ సిలిండర్‌తో ఆమెను తీసుకువెళ్లవచ్చని నిర్ణయించుకున్నారు. వెంటనే ఒక ఆక్సిజన్ సిలిండర్‌ను సిద్ధం చేసి, భార్యను తీసుకుని ఆలయానికి చేరుకున్నారు.
ఆలయ ప్రాంగణంలో విపరీతమైన భక్తుల రద్దీ మధ్య, ఒక చేత్తో భార్య చేయి పట్టుకుని, మరో చేత్తో బరువైన ఆక్సిజన్ సిలిండర్‌ను మోస్తూ ఆయన నెమ్మదిగా నడుస్తున్న దృశ్యం అక్కడి భక్తుల కళ్లను చెమర్చింది.
కదిలించిన వృద్ధ దంపతులు
ఆమె అడుగువేసిన ప్రతిచోటా ఆ భర్త ఆక్సిజన్ సిలిండర్‌ను వెనకాలే మోస్తూ వెళ్లారు. ఇది చూసిన ఇతర భక్తులు స్వచ్ఛందంగా వారికి దారి ఇచ్చి, సులభంగా దర్శనం చేసుకునేలా సహకరించారు. కొందరు ఈ అద్భుత దృశ్యాన్ని తమ సెల్‌ఫోన్లలో బంధించి సోషల్ మీడియాలో పోస్ట్ చేయడంతో అది కాస్తా వైరల్ అయ్యింది.
దర్శనం ముగిసిన తర్వాత ఆ వృద్ధుడు మాట్లాడుతూ.. “దేవతను దర్శించుకున్న తర్వాత నా భార్య ఇప్పుడు మానసికంగా, శారీరకంగా చాలా ఉత్సాహంగా ఉంది. భార్య కోరికను తీర్చడం నా బాధ్యత” అని చెప్పారు.
ప్రేమకు నిదర్శనం
లక్షలాది మంది గుమిగూడే చోటుకి అనారోగ్యంతో ఉన్న భార్యను ఎలా తీసుకువెళ్లాలని ఆయన ఆలోచించలేదు. ముక్కుకు ఆక్సిజన్ పైపు ఉన్నా, ఆమె ముఖంలో చిరునవ్వు చూడటం కోసం ఆయన పడిన తపన నిజమైన ప్రేమకు నిదర్శనం. ఎన్నో అడ్డంకులు ఉన్నా, భార్యకు ఒక కొండంత అండగా నిలిచిన ఆ వృద్ధుడు అందరికీ ఆదర్శంగా నిలిచారు.