పుణె: భారత క్రికెట్ జట్టు స్టార్ ఆల్‌రౌండర్ హార్దిక్ పాండ్యా చిక్కుల్లో పడ్డారు. టీ20 వరల్డ్ కప్ 2026 విజయోత్సవాల సమయంలో జాతీయ జెండాను (తిరంగా) అవమానించారనే ఆరోపణలతో ఆయనపై పుణెలో ఫిర్యాదు నమోదైంది. శివాజీనగర్ పోలీసులు ప్రస్తుతం ఈ ఉదంతంపై విచారణ జరుపుతున్నారు.
విజయోత్సాహం.. వివాదం!
గత ఆదివారం అహ్మదాబాద్‌లోని నరేంద్ర మోదీ స్టేడియంలో జరిగిన ఫైనల్లో న్యూజీలాండ్‌ను 96 పరుగుల తేడాతో ఓడించి భారత్ మూడోసారి టీ20 ప్రపంచకప్‌ను ముద్దాడింది. వరుసగా రెండుసార్లు టైటిల్ నెగ్గి (డిఫెండింగ్ ఛాంపియన్) చరిత్ర సృష్టించిన తొలి జట్టుగా భారత్ నిలిచింది.
ఘటన: విజయం అనంతరం ఆటగాళ్లంతా మైదానంలో జాతీయ జెండాను కప్పుకుని సంబరాలు చేసుకున్నారు. హార్దిక్ పాండ్యా కూడా తిరంగాను ఒంటిపై లంచుకుని వేడుకల్లో మునిగిపోయారు. అయితే, ఆ సమయంలో ఆయన ప్రవర్తన అగౌరవంగా ఉందని ఫిర్యాదులో పేర్కొన్నారు.
పోలీసుల దర్యాప్తు.. లాయర్ వాదన
న్యాయవాది వాజిద్ ఖాన్ పుణెలోని శివాజీనగర్ పోలీస్ స్టేషన్‌లో ఈ ఫిర్యాదు చేశారు:
ఆరోపణ: పాండ్యా జాతీయ జెండాను తన శరీరంపై చుట్టుకుని, అమర్యాదగా ప్రవర్తించారని.. ఇది ‘జాతీయ గౌరవ అవమాన నిరోధక చట్టం’ కింద నేరమని ఆయన వాదించారు.
డిమాండ్: పోలీసులు ఈ కేసును తీవ్రంగా పరిగణించి చట్టపరమైన చర్యలు తీసుకోవాలని కోరారు. ప్రస్తుతం పోలీసులు ప్రాథమిక విచారణ చేస్తున్నారు.
“ఇంకా 10 ఏళ్ల క్రికెట్ ఉంది.. 10 టైటిల్స్ గెలవాలి”
మరోవైపు, టోర్నీలో హార్దిక్ అద్భుత ప్రదర్శన చేశారు. 9 మ్యాచ్‌ల్లో 217 పరుగులు చేయడంతో పాటు 9 వికెట్లు పడగొట్టారు. గెలుపు అనంతరం ఆయన మాట్లాడుతూ.. “నాలో ఇంకా 10 ఏళ్ల క్రికెట్ మిగిలి ఉంది. మరో 10 ఐసీసీ టైటిల్స్ గెలవడమే నా లక్ష్యం. భారత్‌లో వరల్డ్ కప్ గెలవడం చాలా ఎమోషనల్ మూమెంట్. ఈ విజయం కోసం మేము ఎంతో శ్రమించాం” అని ఆనందం వ్యక్తం చేశారు.
2024 జ్ఞాపకాలు..
2024 టీ20 వరల్డ్ కప్ ఫైనల్లో దక్షిణాఫ్రికాపై ఆఖరి ఓవర్ వేసి గెలిపించిన హార్దిక్, ఈసారి కూడా కీలక సమయాల్లో బంతితో మెరిశారు. “ఇంగ్లాండ్‌తో జరిగిన సెమీఫైనల్ 19వ ఓవర్ వేస్తున్నప్పుడు నాకు 2024 ఫైనల్ గుర్తుకు వచ్చింది. ఇషాన్ కిషన్, అభిషేక్ శర్మలకు కూడా బ్యాటింగ్‌కు వెళ్లేటప్పుడు మంచి జ్ఞాపకాలను గుర్తు చేసుకోవాలని చెప్పాను” అని హార్దిక్ వివరించారు.