“మూడేళ్ల ప్రేమ”.. పెద్దల గ్రీన్ సిగ్నల్.. ఒకే ఇంట్లో సహజీవనం.. గర్భం దాల్చగానే అబార్షన్ చేయించి మొహం చాటేసిన కానిస్టేబుల్ ప్రియుడు! మహిళా కానిస్టేబుల్‌కు తప్పని మోసం.. సంచలన ఫిర్యాదు!

ప్రేమ పేరుతో తోటి మహిళా కానిస్టేబుల్‌ను మోసగించినట్లు చెన్నై సాయుధ దళ (ఏఆర్‌) కానిస్టేబుల్‌పై ఎగ్మోర్ మహిళా పోలీస్ స్టేషన్‌లో సంచలన ఫిర్యాదు నమోదైంది. బాధితురాలి ఫిర్యాదు మేరకు పోలీసులు కేసు నమోదు చేసి దర్యాప్తు ప్రారంభించారు.

తిరువారూర్ జిల్లాకు చెందిన 24 ఏళ్ల యువతి చెన్నై సాయుధ దళ విభాగంలో కానిస్టేబుల్‌గా పనిచేస్తున్నారు. ఆమె తేనాంపేటలోని ఓ బ్యాంకులో భద్రతా విధుల్లో ఉండేవారు. విధులకు హాజరయ్యేందుకు పుదుపేటలో ఒక గదిని అద్దెకు తీసుకుని నివసిస్తుండగా, అదే విభాగంలో పనిచేస్తున్న కృష్ణగిరి జిల్లాకు చెందిన మరో కానిస్టేబుల్‌తో ఆమెకు పరిచయం ఏర్పడింది. ఆ పరిచయం కాస్తా కొద్దిరోజుల్లోనే ప్రేమగా మారింది.

గత మూడేళ్లుగా వీరిద్దరూ ప్రేమించుకుంటున్నారు. వీరి ప్రేమకు ఇరు కుటుంబాల పెద్దలు కూడా ఆమోదం తెలిపారు. త్వరలోనే పెళ్లి చేసుకుంటానని నమ్మించడంతో, ఇద్దరూ కలిసి ఒకే ఇంట్లో సహజీవనం ప్రారంభించారు. ఈ క్రమంలో ఆ మహిళా కానిస్టేబుల్ గర్భం దాల్చింది. అయితే, ఆమెను బలవంతంగా ఓ ప్రైవేట్ ఆస్పత్రికి తీసుకెళ్లి గర్భస్రావం (అబార్షన్) చేయించినట్లు ఆరోపణలు ఉన్నాయి.

ఆ తర్వాత సదరు కానిస్టేబుల్ ఆమెను వివాహం చేసుకోవడానికి నిరాకరించడమే కాకుండా, ఆమెతో సంబంధాలను పూర్తిగా తెంచుకున్నాడు. అనంతరం తన సొంత ఊరికి వెళ్లి వేరొక యువతిని పెళ్లి చేసుకున్నట్లు తెలిసింది. దీంతో తీవ్ర మనస్తాపానికి గురైన మహిళా కానిస్టేబుల్ న్యాయం చేయాలని కోరుతూ పోలీస్ స్టేషన్‌లో ఫిర్యాదు చేశారు. ఉన్నతాధికారుల ఆదేశాల మేరకు పోలీసులు ఈ వ్యవహారంపై సమగ్ర విచారణ జరుపుతున్నారు.