మనలో చాలా మంది మైక్రోవేవ్‌ను కేవలం మిగిలిపోయిన ఆహారాన్ని వేడి చేయడానికి మాత్రమే వాడుతుంటారు. కానీ, ఈ గృహోపకరణం మన వంట పనులను వేగవంతం చేయడానికి, సమయాన్ని ఆదా చేయడానికి ఎంతో ఉపయోగపడుతుంది. మాస్టర్‌చెఫ్ ఇండియా మొదటి సీజన్ విజేత పంకజ్ భదౌరియా తన ఇన్‌స్టాగ్రామ్ వీడియో ద్వారా మైక్రోవేవ్ వినియోగంపై 10 అద్భుతమైన చిట్కాలను పంచుకున్నారు.
1. బంగాళదుంపలు ఉడకబెట్టడం: సాధారణంగా బంగాళదుంపలు ఉడకడానికి సమయం పడుతుంది. కానీ మైక్రోవేవ్‌లో కేవలం 4 నిమిషాల్లో వీటిని ఉడికించవచ్చు. బంగాళదుంపలను బాగా కడిగి, వాటిని క్లింగ్ ఫిల్మ్ (Cling film) తో చుట్టి 4 నిమిషాల పాటు మైక్రోవేవ్ చేస్తే, అవి మెత్తగా ఉడికిపోతాయి. పొట్టు తీయడం కూడా సులభమవుతుంది.
2. చల్లబడిన పిండిని మెత్తగా చేయడం: ఫ్రిజ్‌లో పెట్టిన చపాతీ లేదా పూరీ పిండి గట్టిగా మారుతుంది. దీనిని మళ్లీ మెత్తగా చేయడానికి కేవలం 30 సెకన్ల పాటు మైక్రోవేవ్ చేస్తే చాలు. పిండి ఇప్పుడే కలిపినట్లుగా మెత్తగా మారుతుంది.
3. నిమ్మరసం ఎక్కువగా తీయడం: నిమ్మకాయలు గట్టిగా ఉన్నప్పుడు రసం తక్కువగా వస్తుంది. నిమ్మకాయను కోయడానికి ముందు 30 సెకన్ల పాటు మైక్రోవేవ్ చేస్తే, అది మెత్తబడి తక్కువ శ్రమతో ఎక్కువ రసం వస్తుంది.
4. ఆయిల్ లేకుండా ఎగ్ పోచ్ (Poached Eggs): నూనె చుక్క లేకుండా ఎగ్ పోచ్ తయారు చేయవచ్చు. మైక్రోవేవ్ సేఫ్ బౌల్‌లో ఒక కోడిగుడ్డును కొట్టి పోసి, 30 సెకన్ల పాటు వేడి చేస్తే పర్ఫెక్ట్ ఎగ్ పోచ్ సిద్ధమవుతుంది.
5. వెల్లుల్లి పొట్టు తీయడం: వెల్లుల్లి రెబ్బలను వేరు చేసి, క్లింగ్ ఫిల్మ్‌లో చుట్టి 30 సెకన్ల లోపు మైక్రోవేవ్ చేస్తే, వేడి వల్ల పొట్టు వదులై సులభంగా ఊడి వస్తుంది.
6. ఆకుకూరలను ఎండబెట్టడం (Dehydrate): కసూరీ మేతీని ఇంట్లోనే నిమిషాల్లో తయారు చేయవచ్చు. మెంతు ఆకులు లేదా పుదీనాను మైక్రోవేవ్‌లో పెట్టి అవి ఎండిపోయే వరకు (సుమారు 2 నిమిషాలు) ఉంచితే చాలు. వాటిని నలిపితే సుగంధభరితమైన పొడి తయారవుతుంది.
7. పాత బ్రెడ్‌ను తాజాగా మార్చడం: బ్రెడ్ ముక్కలు ఎండిపోయినట్లు ఉంటే, వాటిపై కొద్దిగా నీరు చిలకరించి 15 సెకన్ల పాటు మైక్రోవేవ్ చేయండి. అవి మళ్లీ మెత్తగా, తాజాగా మారుతాయి.
8. ఆయిల్ లేని చిప్స్: బీట్‌రూట్ లేదా బంగాళదుంపలను సన్నగా తరిగి, మైక్రోవేవ్ ట్రేపై కొద్దిగా ఉప్పు చల్లి 4 నిమిషాల పాటు ఉంచితే కరకరలాడే హెల్తీ చిప్స్ సిద్ధమవుతాయి.
9. వస్తువులను క్రిమిరహితం చేయడం (Sterilise): చిన్నపిల్లల గిన్నెలు, గాజు సీసాలు లేదా కిచెన్ క్లాత్స్‌ను 4 నిమిషాల పాటు మైక్రోవేవ్ చేస్తే, అధిక వేడి వల్ల బ్యాక్టీరియా నశించి అవి పరిశుభ్రంగా మారుతాయి.
10. డ్రై ఫ్రూట్స్ వేయించడం: నూనె లేకుండా జీడిపప్పు, బాదం లేదా విత్తనాలను కేవలం ఒక నిమిషం పాటు మైక్రోవేవ్ చేసి కరకరలాడేలా వేయించుకోవచ్చు.